(ویب ڈیسک)معروف اداکارہ صحیفہ جبار خٹک کا کہنا ہے کہ پاکستانی ڈراموں میں اتنے پیسے نہیں کہ گھر کا کچن چل سکے۔
اداکارہ نے حال ہی میں ایک یوٹیوب شو میں شرکت کی جس میں کیرئیر کے آغاز سمیت ذاتی زندگی کے موضوعات پر گفتگو کی۔
میزبان کے سوال پراداکارہ صحیفہ جبارنے بتایا کہ میں ایک پٹھان فیملی سے تعلق رکھتی ہوں لیکن اس کے باوجود ہماری فیملی پڑھائی اور شادی کے حوالے سے کسی زورزبردستی کی قائل نہیں۔
صحیفہ جبار خٹک کے مطابق میں شروع سے ہی پڑھائی بالخصوص ریاضی اور اکاؤنٹنگ میں اچھی تھی لیکن شوبز میں آنے کے حوالے سے کبھی نہیں سوچا تھا،یونیورسٹی لائف کے دوران کزن کے فیشن ہاؤس کیلئے ماڈلنگ کی اور پھر یہ سلسلہ شروع ہوگیا،بعد ازاں شادی سے کچھ روزقبل اداکاری کے لیے آڈیشن کی کال آئی اورمیری سلیکشن ہوگئی۔
شوبز کی آمدن کے حوالے سے صحیفہ جبار خٹک نے کہا کہ ہمارے ڈراموں میں اتنے بھی پیسے نہیں ہیں کہ کچن چل سکے،اگر کوئی ڈرامہ ایسا ہے جو 4 سے 6 مہینے تک شوٹ ہو رہا ہے تو اس کے چیک بھی اسی دوران آتے ہیں اور پھر یہ معاوضہ اداکاروں کو قسطوں میں ملتا ہے۔
صحیفہ جبار نے مزید کہا کہ اگر مجھے صرف ڈراموں پر انحصار کرنا پڑے تو میرا کچن نہیں چل سکتا، یہ صرف اسی وقت ممکن ہے جب میں سال بھر میں 4 پراجیکٹ کروں،روزانہ شوٹنگ پر جاؤں،سوشل میڈیا سے بھی آمدنی ہو تب تو میرا کچن چل سکتا ہے۔