(24نیوز) انگلینڈ کی کرکٹ ٹیم نے ٹیسٹ کرکٹ کی 147 سالہ تاریخ کا انتہائی منفرد ریکارڈ بنا ڈالا ہے، نیوزی لینڈ ویلنگٹن میں میزبان ٹیم کے خلاف دوسرے دن انگلینڈ نے 533 رنز کی برتری بھی حاصل کی اور ٹیسٹ کرکٹ میں5 لاکھ رنز کا سنگِ میل بھی پار کیا۔
انگلینڈ کرکٹ ٹیم نے بین سٹوکس کی سربراہی میں پہلی اننگز میں 280 رنز سکور کیے اور نیوزی لینڈ کو 125 کے ٹوٹل پر آؤٹ کردیا، دوسرے دن کا کھیل ختم ہونے پر انگلینڈ کا سکور 5 وکٹوں کے نقصان پر 378 رنز تھا۔
اس میچ کے دوران انگلینڈ کی ٹیم ٹیسٹ کرکٹ کی تاریخ میں 5 لاکھ رنز سکور کرنے والی پہلی ٹیم بن گئی، یہ انگلینڈ کا 1082 واں ٹیسٹ ہے،4 لاکھ 28 ہزار 868 رنز کے ساتھ آسٹریلیا دوسرے نمبر پر ہے ، 2 لاکھ 78 ہزار 751 رنز کے ساتھ بھارتی کرکٹ ٹیم تیسرے نمبر پر ہے۔
اس میچ میں انگلینڈ کے گَس ایٹکنسن نے ہیٹ ٹرک کی،انگلینڈ کے جو رُوٹ 73 اور بین سٹوکس 35 رنز کے ساتھ کریز پر ہیں، جیکب بیتھیل اور بین ڈکٹ نروس نائنٹیز کا شکار ہوئے۔
3 ٹیسٹ میچوں کی سیریز کے پہلا میچ جو کرائسٹ چرچ میں کھیلا گیا تھا اور نیوزی لینڈ کی ٹیم8 وکٹوں سے ہاری تھی، سیریز برابر کرنے کا اُن کے پاس بھرپور موقع ہے کیونکہ ٹارگٹ تو بڑا ملے گا تاہم وقت بھی اُن کے پاس بہت ہوگا۔
اس میدان کی تاریخ بلیک کیپس کے خلاف ہے،بیسن ریزرو گراؤنڈ میں دوسری اننگز میں سب سے بڑا تعاقب پاکستان نے 2003 میں کیا تھا۔
یہ بھی پڑھیں: چیمپئنز ٹرافی:کیا پاکستانی مؤقف کی جیت ہوگی؟