ضلعی انتظامیہ نے گوگی اور طیفی بٹ کا 3 ارب کا غیر قا نو نی پلازا مسمار کر دیا

(24نیوز)لاہور کی ضلعی انتظامیہ نے والڈ سٹی میں سرکاری ادارے کی زمین پر قائم 3 ارب روپے مالیت کا 3 منزلہ کمرشل پلازا مسمار کر دیا۔ 
تفصیلا ت کے مطا بق ڈپٹی کمشنر لاہور مدثر ریاض ملک کا کہنا ہے کہ اندرون شہربنگلہ ایوب شاہ سے ملحقہ غیر قانونی3 منزلہ پلازا مکمل طور پر مسمار کیا گیا جبکہ یہ پلازا ایم سی ایل کی 2 کنال اراضی پرقبضہ کرکے بنایا گیا تھا۔آپریشن 5 گھنٹے مسلسل جاری رہا جس میں تمام دکانیں اور پختہ اسٹرکچر گرا دیاگیا۔
 مدثر ریاض نے بتا یا کہ گرائے گئے پلازے اور قبضہ کی گئی اراضی کی قیمت 3 ارب روپے ہے۔سرکاری اراضی پر قبضہ کر کے بدنام زمانہ قبضہ گروپ گوگی بٹ اور طیفی بٹ نے پلازا بنا رکھا تھا۔ سرکاری اراضی پر قابض بدنام زمانہ ٹاپ 10 قبضہ گروپ گوگی بٹ اور طیفی بٹ سمیت 10 افراد کے خلاف مقدمہ درج کر لیا گیا۔ یہ مقدمہ تھانہ مستی گیٹ میں والڈ سٹی اتھارٹی کے انسپکٹر عبدالعزیز کی مدعیت میں درج کیا گیا۔
مقدمے میں کار سرکار میں مداخلت، چوری، سرکاری اراضی پر قبضے، پولیس اور سرکاری ملازمین پر حملے کی دفعات بھی شامل ہیں۔
خیال رہے کہ  گوگی بٹ اور خواجہ تعریف گلشن عرف طیفی بٹ شہر کے ٹاپ ٹین بدمعاشوں میں شامل ہیں۔ ایس پی سٹی فراز احمد کے مطابق قبضہ گروپوں کے خلاف آپریشن جاری رہے گا۔