نرس کی بھیانک غلطی،بچے کے زخموں کو ٹانکوں کی بجائے ایلفی لگا دی

(ویب ڈیسک)بھارت کی ریاست کرناٹکا میں ایک نرس نے اسپتال میں لائے گئے7 سالہ بچے کے زخموں کو ٹانکے لگانے کے بجائے اسے ایلفی سے جوڑ دیا۔والدین نے نرس کے خلاف مقدمہ درج کروا دیا۔ْ

بھارتی ذرائع ابلاغ کے مطابق یہ واقعہ ریاست کرناٹکا کے ضلع ہاویری میں واقع ایک سرکاری اسپتال میں پیش آیا جہاں 7 سالہ بچے کو چہرے پر زخم ہونے کی وجہ سے لایا گیا تھا۔اسپتال میں موجود جیوتی نامی نرس نے بچے کے چہرے کے زخم کو ٹانکے سے جوڑنے کے بجائے ایلفی سے جوڑ دیا۔نرس نے اپنے اس عمل کا دفاع کرتے ہوئے کہا کہ بچے کے چہرے پر نشان نہ آئے اس لئے اس نے ایلفی کا استعمال کیا تاہم نرس کی لاپرواہی کی وجہ سے بچے کے والدین نے اس کے خلاف مقدمہ درج کرادیا۔

میڈیا رپورٹ میں  بتایا گیا ہےکہ اسپتال انتظامیہ نے  اس نرس کو میڈیکل قوانین کی خلاف ورزی پر سزا دینے کے بجائے اسے دوسرے اسپتال ٹرانسفر کردیا تاہم جب معاملہ حکومت کے علم میں آیا تو نرس کو نوکری سے برطرف کردیا گیا۔

یہ بھی پڑھیں:اپیل کمپنی کا سستا ترین آئی فون اگلے ہفتے متعارف کروائے جانے کا امکان