آمنہ مسعود کے الزامات ؛سابق چیئرمین نیب پبلک اکاؤنٹس کمیٹی میں طلب

(24 نیوز)پبلک اکاؤنٹس کمیٹی (پی اے سی) میں سابق چیئرمین قومی احتساب بیورو (نیب) جاوید اقبال پر خاتون آمنہ مسعود جنجوعہ کے الزام کی گونج سنائی دی۔کمیٹی کے چیئرمین نور عالم خان نے کہا ہے کہ جاوید اقبال نے لاپتا افراد کے کمیشن میں آنے والی خاتون کو کہا کہ آپ اتنی خوبصورت ہیں شادی کی کیا ضرورت ہے؟کمیٹی کے ارکان نے سابق چیئرمین نیب پر عائد الزام کا سخت نوٹس لینے کا مطالبہ کیا جس کے بعد آج سابق چیئرمین نیب کو طلب کرلیا گیا۔
اس سے پہلے سابق چیئرمین نیب جاوید اقبال اور طیبہ گل کے مبینہ ویڈیو سکینڈل کی تحقیقات کیلئے بھی چیئرمین پی اے سی نے جاوید اقبال اور طیبہ گل کوپی اے سی میں بلانے کا امکان ظاہر کیا تھا اور کہا تھا کہ معاملے کو منطقی انجام تک پہنچایا جائے گا۔
کمیٹی چیئرمین نور عالم خان نے کہا کہ نیب نے بریف کیوں نہیں بھیجا اگلے روز میٹنگ ہے، سابق چیئرمین نیب کہہ رہے ہیں کہ وہ عید منانے کیلئے جارہے ہیں، ان کو کہا ہے جمعرات کی میٹنگ میں حاضر ہوں، کچھ لوگ اپنے آپ کو قانون سے بالاتر سمجھتے ہیں۔
نور عالم خان نے کہا کہ آمنہ مسعود جنجوعہ نے سابق چیئرمین نیب کے بارے میں بات کی ہے، آمنہ جنجوعہ نے بتایا کہ چیئرمین نیب نے لاپتہ افراد کے کمیشن میں آنے والی ایک خاتون کو کہا کہ آپ اتنی خوبصورت ہیں شادی کی کیا ضرورت ہے، ہم سب کی بیٹیاں ہیں، اس معاملے کو بہت سیریس لینا چاہیے۔

یہ بھی پڑھیں: سپریم کورٹ ؛ منحرف ارکان قومی اسمبلی کیخلاف تحریک انصاف کی اپیلیں سماعت کیلئے مقرر