بادل جم کر برسیں گے،محکمہ موسمیات نے نوید سنا دی

(24نیوز)موسم نے کروٹ بدل لی، محکمہ موسمیات نے اسلام آباد راولپنڈی سمیت مختلف شہروں میں بارش کی پیشگوئی کر دی۔

محکمہ موسمیات کے مطابق آج اسلام آباد، راولپنڈی، لاہور، فیصل آباد، گوجرانوالہ، پشاور، ڈیرہ اسماعیل خان، بالائی اور وسطی پنجاب میں بارش ہونے کا امکان ہے،گلگت بلتستان، کشمیر، خیبر پختونخوا اور خطہ پوٹھوہار میں چند مقامات پر آندھی، جھکڑ چلنے اور گرج چمک کے ساتھ بارش ہونے کی توقع ہے۔

آج شام اور رات میں وسطی، جنوبی پنجاب، شمال مشرقی بلوچستان اور بالائی سندھ میں بھی آندھی اور جھکڑ چلنے کے علاوہ گرج چمک کے ساتھ بارش کا امکان ہے۔

یہ بھی پڑھیں:  تیل کی قیمتوں میں اضافہ

کراچی ایک بار پھر گرمی کی لپیٹ میں ہے،شہر میں مطلع صاف اور تیز دھوپ کا راج برقرار ہے،شہر کا زیادہ سے زیادہ درجہ حرارت 37 ڈگری تک جانے کا امکان ہے۔

محکمہ موسمیات کا کہنا ہے کہ کراچی کا موجودہ درجہ حرارت 30 ڈگری سینٹی گریڈ ہے،شہر کا کم سے کم درجہ حرارت 29.5 ڈگری ریکارڈ ہوا،گرمی کی شدت 35 ڈگری تک محسوس کی جارہی ہے،ہوا میں نمی کا تناسب74 فیصد ہے،آئندہ 24 گھنٹوں میں موسم گرم اور مرطوب رہے گا۔

دنیا کے آلودہ ترین شہروں میں کراچی 20ویں نمبر پر آگیا،پاکستان کے آلودہ ترین شہروں میں کراچی پانچویں نمبر پر ہے۔

خطہ پوٹھوہار، خیبرپختونخوا، شمال مشرقی بلوچستان، لاڑکانہ، جیکب آباد اور دادو میں آندھی چلنے اور گرج چمک کے ساتھ بارش کا امکان ہے،ملک کے میدانی علاقوں میں گرمی کی شدت برقرار رہے گی،محکمہ موسمیات کے مطابق کشمور، خیرپور ،دادو،  مری، گلیات، اٹک، چکوال، میانوالی ، جھنگ ، ٹوبہ ٹیک سنگھ، بھکر،لیہ، ملتان اور ڈیرہ غازی خان میں بارش کا امکان ہے۔

بہاولنگر، رحیم یار خان، لودھران، وہاڑی، خانیوال، راجن پور ، بہاولپور، ساہیوال، پاک پتن ،  قصور، اوکاڑہ ، خضدار، قلات، جھل مگسی، سبی، نصیر آباد، ڈیرہ بگٹی، بارکھان میں بارش ہونے کی توقع ہے۔

 گزشتہ روز بھی مختلف شہروں میں بارش ہوئی،موسی ٰ خیل، شیرانی ،ژوب ، تربت ، چترال، دیر، سوات، کوہستان، شانگلہ ، ایبٹ آباد، مانسہرہ ، ہری پور ، بونیر، صوابی، نوشہرہ ، مردان، پشاور، کوہاٹ ،کرک ، بنوں ،خیبر، اورکزئی، وزیرستان اور کرم میں گرج چمک کے ساتھ بارش کی پیشگوئی کی گئی ہے۔