بھارت، رخصتی کے وقت دلہن کی موت ، خوشیوں والے گھر صف ماتم بچھ گئی

(24نیوز) بھارت میں رخصتی کے وقت دل کا دورہ پڑنے سے دلہن کی موت واقع ہو گئی ۔
بھارتی میڈیا کے مطابق ریاست اوڈیشا کے علاقے سونپور میں شادی کی تقریب میں اس وقت صف ماتم بچھ گئی جب عین رخصتی کے وقت زیادہ رونے کی وجہ سے دلہن کی موت واقع ہوگئی۔ڈاکٹرز کا کہنا ہے کہ دلہن کی موت حرکت قلب بند ہونے کی وجہ سے ہوئی، روتے روتے دلہن کی ہچکی بندھ گئی تھی اور کبھی کبھی ایسا ہوتا ہے کہ اس کا اثر دل پر بھی پڑتا ہے۔
اہل خانہ کا کہنا ہے کہ دلہن روزی کے والد کا چند ماہ قبل ہی انتقال ہوا تھا اور وہ باپ کی اچانک موت کی وجہ سے شدید ذہنی دباؤ میں تھی اسی لیے شادی کے تمام انتظامات بھی ماموں نے کئے تھے۔پولیس کا کہنا ہے کہ دلہن کی لاش کو پوسٹ مارٹم کیلئے بھیج دیا ہے، رپورٹ آنے کے بعد تفتیشی عمل کو آگے بڑھایا جائے گا۔