کراچی، ٹریفک حادثے میں باپ بیٹی جاں بحق

(24نیوز) شہر قائد کے علاقے ناظم آباد میں تیز رفتار ٹرک ڈرائیور نے باپ بیٹی کو کچل کر ابدی نیند سلادیا۔
کراچی کے علاقے ناظم آباد نمبر 7 میٹرک بورڈ آفس کے قریب ٹریفک حادثہ پیش آیا جس میں باپ بیٹی جاں بحق جبکہ دو سالہ بچہ زخمی ہوا۔
ریسکیو ذرائع کے مطابق حادثہ واٹرٹینکر کی تیز رفتاری کے باعث پیش آیا، ڈرائیور نے موٹرسائیکل سوار کو ٹکر ماری جس کے نتیجے میں باپ، بیٹی موقع پر ہی جاں بحق ہوگئے۔واٹر ٹینکر کی زد میں آنے والے افراد کو عباسی شہید منتقل کیا گیا جہاں 9 سالہ بچی اور 33 سالہ شخص کی موت کی تصدیق ہوئی جبکہ دو سالہ بچہ ہسپتال میں زیر علاج ہے۔
رپورٹ کے مطابق واقعے میں جاں بحق ہونے والا موٹرسائیکل سوار اور 9 سالہ بچی اورنگی ٹاؤن کے رہائشی تھے، رشتے میں دونوں باپ بیٹی تھے جبکہ زخمی ہونے والا بچہ مقتول کا بیٹا ہے۔حادثے کے بعد مشتعل افراد نے واٹر ٹینکر کو نذر آتش کردیا جبکہ ڈرائیور موقع سے فرار ہوگیا۔