ملک بدری کا عمل شروع ہونےسے پہلے افغان سیٹزن کارڈ ہولڈر ملک چھوڑدیں، وزارت داخلہ 

(اویس کیانی) وزارت داخلہ نے اعلان کیا ہے کہ افغان سٹیزن کارڈ (اے سی سی) ہولڈرز 31 مارچ 2025 تک پاکستان چھوڑ دیں،حکومت یکم اپریل سے ان غیر قانونی غیر ملکیوں کو ملک بدری کا  سلسلہ شروع کرے گی۔

وزارت داخلہ کی جانب سے جاری بیان میں کہا گیا ہے کہ غیر قانونی غیر ملکیوں کی وطن واپسی کا پروگرام یکم  نومبر 2023 سے لاگو ہے،حکومت کے تمام غیر قانونی غیر ملکیوں کو واپس بھیجنے کے فیصلے کے تسلسل میں قومی قیادت نے اب ACC ہولڈرز کو بھی وطن واپس بھیجنے کا فیصلہ کیا ہے،تمام غیر قانونی غیر ملکیوں اور ACC ہولڈرز کو دوبارہ بتایا جاتا ہے کہ وہ 31 مارچ 2025 سے پہلے رضاکارانہ طور پر ملک چھوڑ دیں،حکومت یکم اپریل سے ان غیر قانونی غیر ملکیوں کو ملک بدری کا  سلسلہ شروع کرے گی۔

واضح رہے کہ ان کی باوقار واپسی کے لیے پہلے ہی کافی وقت دیا جا چکا ہے،وزارت داخلہ کے مطابق اس بات پر زور دیا گیا ہے کہ وطن واپسی کے عمل کے دوران کسی کے ساتھ بدسلوکی نہیں کی جائے گی اور واپس جانے والوں  کے لیے خوراک اور صحت کی دیکھ بھال کے انتظامات بھی کیے گئے ہیں،پاکستان ایک مہربان میزبان رہا ہے اور ایک ذمہ دار ریاست کے طور پر اپنے وعدوں اور ذمہ داریوں کو پورا کرتا رہتا ہے، اس بات کا اعادہ کیا جاتا ہے کہ پاکستان میں رہنے والے افراد کو تمام قانونی تقاضے پورے کرنا ہوں گے اور پاکستان کے آئین کی پاسداری کرنی ہوگی۔ 

یہ بھی پڑھیں؛ صدر ٹرمپ نے دورہ سعودی عرب کا اعلان کر دیا