(روزینہ علی)محکمہ موسمیات نے جمعہ کے روز خیبرپختونخوا کے بعض علاقوں،کشمیر اور گلگت بلتستان میں مطلع جزوی ابرآلود رہنے کے علاوہ شام/رات میں چند مقامات پر ہلکی بارش اور بلند و بالاپہاڑوں پر ہلکی برفباری کی پیش گوئی کردی۔
رپورٹ کے مطابق وفاقی دارالحکومت اور گردونواح میں موسم خشک رہنے کا امکان ہے۔ادھرخیبرپختونخوا کے بیشتر اضلاع میں موسم خشک رہنے کا امکان ہے۔ تاہم شام/رات میں چترال، دیر، سوات اور گردونواح میں مطلع جزوی ابرآلود رہنے کے علاوہ چند مقامات پر ہلکی بارش اور بلندو بالا پہاڑوں پر ہلکی برفباری ہو سکتی ہے۔
دوسری جانب پنجاب کے بیشتر اضلاع میں موسم خشک رہنے کا امکان ہے۔ تاہم سیالکوٹ، نارووال، گوجرانوالہ، لاہور، قصور، اوکاڑہ ، سرگودھا، جھنگ، شیخوپورہ، ساہیوال، فیصل آباد، بہاولپور، ملتان، رحیم یارخان، ڈی جی خان اور گردونواح میں سموگ چھائے رہنے کی توقع ہے۔ منگلا، راولپنڈی، چکوال، جہلم، شیخوپورہ، ساہیوال، فیصل آباد، بہاولپور، ملتان، ڈیرہ غازی خان اور گردو نواح میں چند مقامات پرصبح کے اوقات میں دُھند پڑنے کا بھی امکان ہے۔
محکمہ موسمیات کے مطابق بلوچستان کے بیشتر اضلاع میں موسم خشک جبکہ پہاڑی علاقوں میں صبح /رات کےاوقات میں سرد رہنے کا امکان ہے،سندھ کے بیشتر اضلاع میں موسم گرم اور خشک رہنے کا امکان ہے۔
یہ بھی پڑھیں:190ملین پاؤنڈ کیس، عمران خان اور بشریٰ بی بی کی بریت کی درخواستوں پر اسلام آباد ہائیکورٹ کا بڑا فیصلہ