ٹام کروز کی مشہورزمانہ فلم"مشن امپاسیبل: دی فائنل ریکوننگ" کا سنسنی خیز ٹریلر
Stay tuned with 24 News HD Android App
(ویب ڈیسک)ہالی ووڈ کی مشہور زمانہ فلم "مشن امپاسیبل" سیریز کی نئی فلم "دی فائنل ریکننگ" کاسنسنی خیز ٹریلر جاری کر دیا گیا۔
دومنٹ سے زائد دورانیے پر مشتمل اس اسٹنٹس سے بھرپور سنسنی خیز ٹریلر نے مداحوں کے دل جیت لیے ہیں۔ اس میں شائقین کو بھرپور ایکشن، پرانی فلموں کے مناظر اور سپر اسٹار ٹام کروز کے دلچسپ اسٹنٹس دیکھنے کو ملتے ہیں۔
ٹریلر کا آغاز ٹام کروز (ایتھن ہنٹ) کے ہوائی جہاز سے لٹکنے کے سین سے ہوتا ہے، جبکہ پس منظر میں ایک آواز سنائی دیتی ہے،"یہ سب سچ نہیں ہو سکتا"‘ اس کے بعد فلم کی پرانی قسطوں کے اہم مناظر دکھائے جاتے ہیں جن میں ایتھن ہنٹ کے دل دہلا دینے والے ایکشن سین دکھائے گئے ہیں۔
فلم میں اس بار خطرہ اور بھی بڑا دکھایا گیا ہے،اس کی کہانی ایک باغی مصنوعی ذہانت (AI) جسے "دی اینٹٹی" کہا جا رہا ہے، کے گرد گھومتی ہے،اس میں دکھایا گیا ہے کہ دنیا تباہی کے دہانے پر ہے اور ایتھن ہنٹ اپنی ٹیم سے آخری بار اعتماد کرنے کی اپیل کرتا ہے۔
یاد رہے کہ کرسٹوفر میک کواری کی ہدایتکاری میں بننے والی یہ فلم 23 مئی کو سینما گھروں میں نمائش کے لیے پیش کی جائے گی،فلم کی کاسٹ میں ٹام کروز سمیت ہیلی ایٹویل، وِنگ ریمز، سائمن پیگ، ونیسا کربی اور ایسائی مورالز شامل ہیں۔