(24 نیوز)جمعیت علماء اسلام ف کے سربراہ مولانا فضل الرحمٰن نے کہا ہے کہ 13 اپریل کو کراچی میں اسرائیل مردہ باد مظاہرہ ہو گا، نیتن یاہو جنگی مجرم ہے۔
مولانا فضل الرحمٰن نے اپنے ایک بیان میں کہا ہے کہ غزہ کے مسلمانوں پر جو بیت رہی ہے یا بیت چکی ہے وہ تاریخ کے صفحات پر سیاہ دھبوں کے سوا کچھ نہیں، اسرائیل نے امن معاہدہ توڑ کر غزہ پر شب خون مارا ہے، وہاں شیر خوار بچے زندگی اور موت کی کشمکش میں تڑپ رہے ہیں۔ انہوں نے کہا ہے کہ نیتن یاہو جنگی مجرم ہے، اسے عالمی عدالتِ انصاف نے گرفتار کرنے کا حکم دیا ہے، غزہ میں نہ ادویات ہیں، نہ کھانے پینے کی کوئی چیز لیکن مسلمان حکمراں خاموش ہیں، جرم کرنے والے اور اس جرم پر خاموش رہنے والے برابر کے مجرم تصور کیے جائیں گے۔
جے یو آئی کے سربراہ نے بیان میں مزید کہا کہ اسلامی دنیا کا حکمراں امریکا اور مغرب کے سامنے جھک رہا ہے، امتِ مسلمہ آج بھی ایک صف میں ہے لیکن حکمراں جذبات کی ترجمانی نہیں کر رہے، گریٹر اسرائیل کی طرف بڑھتے قدموں سے کوئی عرب ملک نہیں بچ سکے گا۔ امتِ مسلمہ اپنے ملکوں میں اپنے حکمرانوں پر سیاسی دباؤ بڑھائے، 10 اپریل کو تمام مکاتبِ فکر کا کنونشن منعقد کرنے کا فیصلہ کیا گیا ہے، کنونشن میں مشترکہ حکمتِ عملی اور مؤقف اپنایا جائے گا۔
یہ بھی پڑھیں:ملٹری کورٹس، سپریم کورٹ آئینی بینچ کا آئندہ دو سماعتوں پر کیس مکمل کرنیکا عندیہ