ڈنمارک کی وزیراعظم کو مکا مارنے والے ملزم کو قید کی سزا

(ویب ڈیسک)ڈنمارک کی ایک عدالت نے ایک غیر ملکی شہری کو ڈنمارک کی وزیر اعظم پر حملہ کرنے کے جرم میں چار ماہ قید کی سزا سنادی۔

غیر ملکی خبر رساں ادارے کی رپورٹ کے مطابق پولینڈ کے شہری پر الزام تھا کہ اس نے ڈنمارک کی وزیر اعظم فریڈریکسن کو مکا مار کر گرانے کی کوشش کی تاہم وہ گرتے گرتے بچیں، مکا مارنے کا یہ واقعہ ماہ جون کو پیش آیا تھا۔

عدالتی فیصلے کے مطابق مجرم کو سزا پوری کرنے کے بعد ملک بدر کر دیا جائے گا اور اگلے چھ سال تک ڈنمارک واپس آنے پر بھی پابندی ہوگی۔

مقدمے کی سماعت کے موقع پر جج نے ملزم کو مخاطب کرتے ہوئے کہا کہ تم پر الزام ہے کہ تم نے وزیر اعظم کے کندھے پر مکا مارا جو کہ گواہان اور ثبوتوں سے ثابت ہوچکا ہے اس لیے تمہیں سزا سنائی جا رہی ہے۔

مقدمے کی گزشتہ سماعت تک ملزم نے واقعے میں ملوث ہونے اور جرم قبول کرنے سے انکار کیا، اس نے کہا کہ وزیر اعظم سے سامنا ضرور ہوا تھا لیکن میں نے ان پر ہاتھ نہیں اٹھایا تاہم فیصلہ سنائے جانے کے بعد ملزم نے عدالت کو بتایا کہ اسے عدالت کا فیصلہ منظور ہے۔

یہ بھی پڑھیں:خیبرپختونخوا میں زلزلے کے شدید جھٹکے

46سالہ وزیر اعظم فریڈرکسن 2019 میں اس منصب پر کم عمر ترین وزیر اعظم کے طور پر فائز ہوئیں، اس وقت ان کی عمر 41 سال تھی۔

میڈیا رپورٹ کے مطابق قبل ازیں واقعے کے فوری بعد پولیس نے 39 سالہ غیر ملکی شہری کو حراست میں لے لیا گیا تھا، ڈنمارک کے حکام نے پابندی لگائی ہے کہ مجرم کا نام میڈیا میں ظاہر نہیں کیا جائے گا، وہ پچھلے پانچ سال سے ڈنمارک میں مقیم تھا۔