(فاران خان)سندھ بھرمیں آج میڈیکل اورڈینٹل کالجزوجامعات کے داخلہ ٹیسٹ کاآج دوبارہ انعقادہوا،ایم ڈی کیٹ میں سندھ بھر سے38 ہزار609 امیدواروں نے شرکت کی، اس دوران امتحانی مراکز کے اطراف میں دفعہ 144 نافذ کی گئی تھی۔
ایم ڈی کیٹ ری ٹیسٹ کے مراکز کراچی، حیدرآباد، جامشورو، شہید بے نظیر آباد، لاڑکانہ اور سکھر میں قائم کیے گئے،ایم ڈی کیٹ ری ٹیسٹ میں سندھ بھر سے 38 ہزار 683 امیدواروں نے شرکت کی، کراچی میں ایم ڈی کیٹ کے 12 ہزار 849 امیدوار شریک ہوئے جن میں سے 6 ہزار 400 امیدوار این ای ڈی یونیورسٹی اور 6 ہزار 449 نے کراچی یونیورسٹی میں امتحان دیے۔
آئی بی اے سکھر کے مطابق صبح ساڑھے 8 بجے سے پہلے ہی امیدواران امتحانی مراکز میں پہنچنا شروع ہوگئے تھے، پرچہ 200 کثیر انتخابی سوالات پر مشتمل جس کا دورانیہ ساڑھے 3 گھنٹے کا تھا۔
جامعہ کراچی اور جامعہ این ای ڈی میں ٹیسٹ کی نگرانی وائس چانسلر آئی بی اے ڈاکٹر آصف شیخ نے کی اور انہوں نے میڈیا کے سامنے بڑے صندوقوں سے پرچہ نکالا اور بتایا کہ پرچہ سیل ہے اور اس کا کوئی حصہ آؤٹ نہیں ہوا، صندوق بند گاڑی میں لائے گئے جس کی نگرانی کیمرے کر رہے تھے اور پولیس بھی ہمراہ تھی۔
حیدرآباد میں بھی آج میڈیکل اور ڈینٹل کالجز و جامعات کے داخلہ ٹیسٹ لیے گئے، حیدرآباد پبلک اسکول میں 6 ہزار 406 اور جامشورو میں 6 ہزار 254 امیدوار وں نے ٹیسٹ دیا۔