کوئی مجھ سے شاہ رخ خان سے متعلق سوال نہ کرے،ماہرہ خان

 (ویب ڈیسک)اداکارہ ماہرہ خان نے کہا ہے کہ وہ چاہتی ہیں کہ اب لوگ ان سے بالی وڈ اداکار شاہ رخ خان کے ساتھ کام کرنے کے تجربے سے متعلق سوال کرنا بند کردیں۔

آرٹس کونسل آف پاکستان کراچی میں جاری سترہویں اردو کانفرنس کے دوران ماہرہ خان نے بتایا کہ وہ شاہ رخ خان پر بات کرنے سے تنگ نہیں آتیں لیکن لوگوں کے غلط مطلب نکالنے سے پریشان ہوتی ہیں۔

ماہرہ خان نے کہا کہ وہ خود سے شاہ رخ خان پر بات نہیں کرتیں، جب ان سے بالی وڈ اداکار سے متعلق کوئی سوال کیا جاتا ہے تو وہ اس کا جواب دیتی ہیں،سوال پوچھنے پر جواب دینے کے بعد لوگ تبصرہ کرتے ہیں اور الزام لگاتے ہیں کہ وہ خود ہر بار شاہ رخ خان پر بات کرتی ہیں لیکن درحقیقت ایسا نہیں۔

یہ بھی پڑھیں:ہیروئن کاسٹ کرنے ’ہیرا منڈی‘ گئے، جہاں ریما دکھائی گئی لیکن اسے مسترد کیا، ناصر ادیب

نامور اداکارہ کا کہنا تھا کہ اسی لیے وہ یہی کہتی اور چاہتی ہیں کہ کوئی ان سے شاہ رخ خان سے متعلق کوئی سوال نہ کرے تاکہ وہ کوئی جواب بھی نہ دیں۔

ماہرہ خان 2016 میں شاہ رخ خان کے ساتھ بالی وڈ فلم "رئیس" میں کام کر چکی ہیں اور اداکارہ متعدد بار اداکار کے حوالے سے پوچھے جانے والے سوالوں کے کھل کر جواب دیتی رہی ہیں۔