(24 نیوز) متحدہ عرب امارات کا ’ہوپ‘ نامی خلائی مشن رواں ماہ چین اور امریکا کے خلائی جہازوں سے پہلے سیارہ مریخ تک پہنچ جائے گا۔
خبر رساں ادارے ’اے ایف پی‘ کے مطابق گزشتہ سال جولائی میں عرب امارات، امریکا اور چین نے خلائی مشن ایسے وقت پر روانہ کئے تھے جب سیارہ مریخ زمین کے بہت قریب ہوتا ہے۔مشن کامیاب ہونے پر، عرب امارات مریخ تک پہنچنے والا پانچواں ملک ہوگا۔ جب کہ عرب امارات کے بعد چین مریخ تک پہنچنے والا چھٹا ملک ہوگا۔
ہوپ مشن اپنی منزل پر پہنچنے کے بعد 687 دن تک مریخ کے مدار میں گردش کرے گا۔اماراتی خلائی مشن کے پراجیکٹ منیجر عمران شرف نے کہا کہ یہ ملک کےلئے انتہائی اعزاز کی بات ہے کہ متحدہ عرب امارات اس سال مریخ تک پہنچنے والا پہلا ملک ہوگا۔انہوں نے کہا کہ تمام ممالک کی خلا تک پہنچنے کی باہمی کوشش ہے اور عرب امارات کسی بھی دوڑ میں شامل نہیں ہے۔
ہوپ خلائی مشن کا مقصد سیارہ مریخ کے موسمی حالات کا اندازہ لگانا ہے اور آئندہ ایک سو سال میں مریخ پر انسانوں کو آباد کرنا بھی اس مشن کے اہداف میں شامل ہے۔مریخ کے درجہ حرارت کو مانیٹر کرنے کے لئے تین سائنسی آلات کا استعمال کیا جائے گا۔ درجہ حرارت کے حوالے سے معلومات رواں سال ستمبر میں زمین پر پہنچنا شروع ہوں گی۔