(ویب ڈیسک)بھارتی ریاست اترپردیش میں شوہر اور 6 بچوں کو چھوڑ کر بھکاری کے ساتھ بھاگنے والی خاتون کی اصل کہانی سامنے آگئی۔
گزشتہ روز یہ خبر سامنے آئی تھی کہ بھارت کی ریاست اترپردیش کی خاتون راجیشوری اپنے شوہر راجو اور 6 بچوں کو چھوڑ کر ایک بھکاری کے ساتھ فرار ہوگئی تھی لیکن اب اس خبر کی اصل حقیقت سامنے آئی ہے۔
بھارتی میڈیا رپورٹس کے مطابق شوہر کو چھوڑ کر جانے والی خاتون منظرعام پر آئی ہے اور اس نے پولیس کے سامنے اپنا بیان ریکارڈ کروا دیا ہے۔
خاتون نے اپنے اوپر لگنے والے تمام الزامات کو مسترد کرتے ہوئے کہا ہے کہ وہ بھکاری کے ساتھ فرار نہیں ہوئی بلکہ وہ اس وقت اپنے کسی قریبی رشتہ دار کے گھر پر ہے۔
راجیشوری نے پولیس کو بتایا کہ وہ اپنے شوہر کے ظلم و ستم سے تنگ آچکی تھی کیونکہ اس کا شوہر اسے مارتا پیٹتا تھا جس کی وجہ سے وہ گھر سے بھاگ گئی۔
خاتون نے چوری کے الزامات بھی مسترد کیے ہیں جس کے بعد پولیس نے شوہر کے خلاف مقدمہ درج کر کے تحقیقات کا آغاز کر دیا ہے۔
واضح رہے کہ راجو نے اپنی بیوی پر الزام عائد کیا تھا کہ وہ بچوں کو چھوڑ کر بھکاری کے ساتھ بھاگ گئی ہےاور راجو نے پولیس کو بتایا کہ وہ ہرپال پور کے علاقے میں اپنی بیوی راجیشوری اور 6 بچوں کے ساتھ رہتا تھا۔
راجو کے مطابق 45 سالہ ننھا پنڈت نامی شخص کبھی کبھار محلے میں بھیک مانگنے آتا تھا اور اس کی بیوی سے بات کرتا تھا بعد میں دونوں کی فون پر بھی بات چیت شروع ہوگئی اور پھر اس کے بعد میری بیوی اس کے ساتھ بھاگ گئی۔
راجو نے پولیس کو یہ بھی بتایا کہ اس کی بیوی راجیشوری نے اپنی بیٹی خوشبو کو بتایا تھا کہ وہ کپڑے اور سبزی لینے بازار جا رہی ہے لیکن وہ واپس نہیں آئی۔
اس نے مزید کہا کہ وہ بھینس بیچ کر حاصل کی گئی رقم بھی اپنی بیوی کے ساتھ لے گئی تھی، اور اس کا شک ہے کہ بھکاری نے ہی اس کی بیوی کو اپنے ساتھ لے لیا۔
راجو کی شکایت پر پولیس نے دفعہ 87 اغوا کے تحت مقدمہ درج کرکے تحقیقات کا آغاز کیا تھا جس کے بعد خاتون منظرِ عام پر آئی اور اپنی وضاحت دی۔
مزید پڑھیں:ایلون مسک دنیا کے امیر ترین شخص قرار