غر بت کا مارا باپ مردہ بیٹے کو شا پربیگ میں لے جانے پر مجبور،ویڈیو وا ئرل

(24نیوز)غر بت کا مارا با پ اپنے ہی بیٹے کی لاش کو پلاسٹک کے تھیلے میں 3 کلو میٹر دور لے جانے پر مجبورہوگیا۔بھارتی ریاست بہار میں بے حسی کے واقعہ نے لوگوں کو حیرت زدہ کردیا ہے۔
تفصیلات کے مطا بق بہار کے علاقے کٹیہار میں یہ واقعہ اس وقت رونما ہوا، جب ایک شخص کو اپنے مردہ بیٹے کی لاش لے جانے کے لیے گاڑی فراہم کرنے سے انکار کردیا گیا۔بھارتی میڈیا میں اس شخص کی پلاسٹک کے تھیلے میں بیٹے کی لاش لے جانے کی ویڈیو وائرل ہوچکی ہے۔ یہ شخص اپنے بیٹے کی لاش پولیس کی طرف سے گاڑی کی فراہمی کے انکار کے بعد پلاسٹک کے تھیلے میں لے جانے پر مجبور ہوا۔
بھارتی میڈیا کے مطابق اس مجبو ر شخص کا بیٹا ندی میں ڈوب گیا تھا، اس نے لاش لے جانے کے لیے گاڑی پولیس سے طلب کی تو اسے انکار کردیا گیا۔اس شخص کو اپنے بیٹے کا پوسٹ مارٹم کروانے کے لیے اپنے مردہ بیٹے کو پلاسٹک کے تھیلے میں اسپتال لے جانا پڑا۔
میڈیا میں واقعہ رپورٹ ہونے کے بعد پولیس حکام حرکت میں آگئے، کٹیہار کے ایس ڈی پی نے اس حوالے سے موقف اختیار کیا کہ وہ معاملے کی تحقیقات کر رہے ہیں۔