نا اہلی کیس۔۔۔۔گیلانی کیخلاف کل اہم سماعت

(24نیوز)الیکشن کمیشن نے سینیٹ انتخابات سے قبل علی حیدرگیلانی کی ویڈیو کے معاملے پر پی ٹی آئی کی جلد سماعت کی درخواست منظور کرلی ،الیکشن کمیشن میں پی ٹی آئی کی درخواست پر کل سماعت ہوگی ۔یوسف رضاگیلانی کی کامیابی کا نوٹیفکیشن روکنے سے متعلق درخواست پر سماعت بھی ہوگی۔
تفصیلات کے مطابق پاکستان تحریک انصاف کی جانب سے آج یوسف رضا گیلانی نااہلی کیس کی جلد سماعت کی درخواست دائر کی گئی تھی۔تحریک انصاف کے رہنما فرخ حبیب، کنول شوزب اور ملیکہ بخاری کی طرف سے دائردرخواست میں کہاگیاکہ یوسف رضا گیلانی چیئرمین سینٹ کے امیدوار ہیں، چیئرمین سینٹ کا انتخاب 12 مارچ کو شیڈول ہے، الیکشن کمیشن نے گیارہ مارچ کو کیس مقرر کر رکھا ہے۔ درخواست میں استدعا کی گئی کہ مناسب ہوگا وقت ضائع کئے بغیر کیس کی فوری سماعت کی جائے، پہلی بار ہوا کہ چیئرمین سینٹ کا امیدوار انتخابی بدعنوانی کا مرتکب قرار پایا۔
 بعد ازاں پارلیمانی سیکرٹری برائے ریلوے فرخ حبیب نے میڈیا سے گفتگو کرتے ہوئے کہاکہ سینٹ انتخابات میں وہ بات سچ ثابت ہوئی جو وزیر اعظم نے کہا۔ فرخ حبیب نے کہاکہ وزیراعظم نے کہا سینٹ انتخابات میں منڈیاں لگتی ہیں،مریم نواز نے کہا ہم نے ٹکٹوں پر ووٹ خریدے ہیں، ثابت ہوگیا کہ سینٹ انتخابات میں خریدوفروخت ہوتی ہے۔ انہوں نے کہاکہ ویڈیو دو مارچ کو آئی آج چھ روز گزر گئے۔ فرخ حبیب نے کہاکہ آئین کا آرٹیکل 218،3 کرپٹ پریکٹسز کے خلاف ہے ،مریم نواز کی سٹیٹمنٹ آئین کے خلاف ہے، الیکشن کمیشن میں ہماری دو درخواستیں موجود ہیں، الیکشن کمیشن کے پاس تمام اختیارات موجود ہیں، الیکشن کمیشن ہماری درخواست پر فوری سماعت کرے، سماعت کرنے کے لئے الیکشن کمیشن گیارہ مارچ کا انتظار نہ کرے۔ ملیکہ بخاری نے کہاکہ چاہتے ہیں الیکشن کمیشن ہنگامی بنیادوں پر سماعت کرے،الیکشن کمیشن سے استدعا ہے اپنی آئینی ذمہ داری پوری کرے،الیکشن کمیشن کے پاس اعلی' عدالت کا فیصلہ موجود ہے۔کنول شوذب نے کہاکہ سینٹ الیکشن میں ووٹ چوری کرکے چور سینٹ میں آگیا ہے، ہمارے سامنے ہے کس طرح سینٹ الیکشن چوری ہوا۔ انہوںنے کہاکہ بارہ تاریخ کو چیئرمین سینٹ کا الیکشن ہے اور ہماری درخواست گیارہ کو سماعت کے لئے مقرر ہے، الیکشن کمیشن یا تو چیئرمین سینٹ کا انتخاب موخر کردے یا ہماری درخواست جلدی سن لے، ہم الیکشن کمیشن سے ڈسکہ والا ایکشن مانگ رہے ہیں، التجا ہے ہماری درخواست جلدی سنیں۔