بنگلہ دیش: دھماکے کے نتیجے میں 15 افراد ہلاک، 100 سے زائد زخمی

(ویب ڈیسک) بنگلہ دیش کے دارالحکومت ڈھاکہ کے مصروف کاروباری مرکز کی دفتری عمارت میں دھماکے کے نتیجے میں 15 افراد ہلاک جبکہ 100 سے زائد زخمی ہوگئے۔

بین الاقوامی خبررساں ادارے کے مطابق ڈھاکہ کی مصروف ہول سیل مارکیٹ کی 7 منزلہ عمارت میں ہونے والے دھماکے کے اسباب تاحال معلوم نہیں ہو سکے تاہم سیفٹی قوانین کے نفاذ میں غفلت کے باعث عمارتوں میں آگ اور دھماکوں کو واقعات معمول بنے ہوئے ہیں۔

میڈیا رپورٹس کے مطابق دھماکے کے نتیجے میں عمارت کی دیواریں اور کچھ منزلیں مکمل طور پر تباہ ہو گئیں جبکہ عمارت کا ملبہ باہر سڑکوں پر موجود لوگوں پرگرنے سے بھی کئی افراد زخمی ہوئے۔

پولیس حکام کے مطابق دھماکے کے نتیجے میں 2 خواتین سمیت 15 افراد ہلاک ہوگئے جبکہ 112 سے زائد زخمی ہوئے  جنہیں طبی امداد کیلئے ڈھاکہ میڈیکل کالج اسپتال منتقل کر دیا گیا ہے۔

At least 15 people were killed and several others injured in an explosion in a crowded market area in Bangladesh's capital Dhaka https://t.co/5nG8go1tKO pic.twitter.com/1IFaeeNxxN

— Reuters (@Reuters) March 7, 2023

ریسکیو حکام کے مطابق دھماکے کے فوری بعد ریسکیو اہلکار جائے واقعہ پر پہنچ گئے، عمارت میں پھنسے لوگوں کو نکالنے کیلئے امدادی کارروائیاں جاری ہیں، خدشہ ہے کہ اب بھی کچھ لوگ عمارت میں پھنسے ہو سکتے ہیں، اس وقت عمارت میں داخل ہونا بہت ہی خطرناک ہے تاہم عمارت کے پلرز کو سہارا دینے کے بعد ہی گراؤنڈ فلور اور انڈرگراؤنڈ پھنسے لوگوں کو ریسکیو کرنے کا کام کو شروع کیا جاسکے گا۔

پولیس کمشنر ڈھاکہ  کا کہنا تھا کہ معاملے کی تحقیقات شروع کر دیں ہیں جلد معلوم ہو جائے گا کہ واقعہ دہشتگردی کی کارروائی تھا یا ایک اتفاقی حادثہ، جائے واقعہ پر فوج اور بم ڈسپوزل اسکواڈ کے اہلکار بھی پہنچ چکے ہیں۔