(24 نیوز)روزے کو بلڈ کلاٹںگ سے محفوظ رکھنے میں کلیدی قرار دیا گیا ہے، جبکہ روزے سے دل اور دماغ میں خون کی ترسیل بھی بہتر ہوتی ہے، ماہرین نے 160 رضاکاروں پر تحقیق کی جو کہ امراض قلب کی پیچیدگیوں کا شکار تھے۔
طبی جریدے میں شائع تحقیق کے مطابق تمام رضاکاروں کو دو گروپوں میں تقسیم کر کے ان میں سے ایک گروپ کو روزے رکھنے (خاص وقت تک بھوکا رہنے) جبکہ دوسرے گروپ کو محدود غذائیں کھانے کا مشورہ دیا۔
تمام رضاکار تحقیق کے دوران خون پتلا کرنے والی گولی ’اسپرین‘ کا بھی استعمال کرتے رہے، کیونکہ تمام افراد دل کی شریانوں میں خون جم جانے کے مسائل میں مبتلا تھے۔
ماہرین نے تحقیق شروع کرنے سے قبل اور بعد میں تمام رضا کاروں کے مختلف بلڈ ٹیسٹس کیے جب کہ ماہرین نے ایسا ہی طریقہ چوہوں پر بھی آزمایا۔معلوم ہوا کہ محض 10 روز تک روزے رکھنے سے بھی بلڈ کلاٹنگ سے بچا جا سکتا ہے۔
روزہ رکھنے والے افراد کے دل اور دماغ سمیت پورے جسم میں خون کی ترسیل بہتر ہوئی جبکہ مخصوص غذائیں کھانے والے افراد کے خون میں ’پلیٹیلیٹس‘ کو متحرک دیکھا گیا۔
جب ’پلیٹیلیٹس‘ زیادہ متحرک ہوتے ہیں، تب وہ ایک خاص طرح کی پروٹین بڑھا دیتے ہیں، جس سے بلڈ کلاٹنگ ہوتی ہیں، یعنی خون گاڑھا ہونا یا جمنا شروع ہونے لگتا ہے۔