چیمپئنز ٹرافی فائنل کے بعدکیا روہت شرما ریٹائر ہوجائینگے؟ شبمن گل نے بتادیا

(24نیوز)بھارتی کرکٹ ٹیم کےکپتان روہت شرما کی ایک روزہ کریئر سے ریٹارمنٹ کی بازگشت چیمپئنز ٹرافی کے فائنل تک پہنچ گئی۔

دبئی کرکٹ سٹیڈیم میں فائنل سے پہلے روہت شرما کے ایک روزہ میچز سے ریٹائرمنٹ پر نائب کپتان شبمن گل کو دو بار بیانات دینے پڑگئے۔

ایک بار پریس کانفرنس کے دوران اور دوسری بار پریس کانفرنس ختم ہونے کے بعد بھارتی نائب کپتان شبمن گل کی پریس روم میں دوبارہ انٹری ہوئی اور  انہوں نے روہت شرما کی ریٹائرمنٹ  پر  وضاحت  دیتے ہوئے صحافیوں سے درخواست کی کہ اُن کی گفتگو کو سیاق و سباق سے (Misquote) ہٹ کر نہ لیا جائے۔

پریس کانفرنس کے دوران بھارتی نائب کپتان شبمن گل سے روہت شرما کی50  اوورز فارمیٹ سے ریٹائرمنٹ سے متعلق سوال پوچھا گیا تو بھارتی ٹیم کی کپتانی کے امیدوار شبمن گل نےکہا کہ شاید روہت شرما چیمپئنز ٹرافی کے فائنل کے بعد اپنے مستقبل سے متعلق فیصلہ لیں گے۔

شبمن گل نے کہا کہ روہت شرما نے اپنے کریئر سے متعلق ڈریسنگ روم میں فی الحال کوئی گفتگو نہیں کی ہے۔

انھوں نے کہا کہ 'ڈریسنگ روم میں تو چiمپئنز ٹرافی جیتنے کی بات ہورہی ہے، اب تک نہ میرے ساتھ اور نہ ٹیم کے ساتھ اس بارے میں روہت شرما نے کوئی بات کی ہے'۔

واضح رہےکہ روہت شرما 2024 میں ٹی ٹوئنٹی ورلڈکپ جیتنے کے بعد ٹی ٹوئنٹی فارمیٹ سے ریٹائرمنٹ کا اعلان کرچکے ہیں۔