بجلی اور پیٹرولیم کی قیمتوں میں مزید اضافہ ناقبول ہوگا: حسن مرتضیٰ

(ویب ڈیسک) جنرل سیکرٹری پیپلزپارٹی وسطی پنجاب سید حسن مرتضیٰ نے کہا ہے کہ بجلی اور پیٹرولیم کی قیمتوں میں مزید اضافہ ناقبول ہوگا، حکومت کی اولین ترجیح عام آدمی کے معیار زندگی میں بہتری ہونا چاہئے۔

حکومت کی اولین ترجیح عام آدمی کے معیار زندگی میں اضافہ ہونا چاہیے
یہ حکومت مہنگائی ختم کر کے غریب کو سہارا دینے آئی تھی
بجلی اور پٹرولیم کی قیمتوں میں مزید اضافہ ہرگز قابلِ قبول نہیں ہوگا
سیلاب کی تباہ کاریوں نے مہنگائی کو آؤٹ آف کنٹرول کردیا ہے

— Syed Hassan Murtaza (@S_HassanMurtaza) September 7, 2022

سید حسن مرتضیٰ نے اپنے بیان میں کہا کہ سیلاب نے مہنگائی کو قابو سے باہر کر دیا ہے، ایک تہائی ملک پانی میں ڈوبا ہوا ہے، ساڑھے تین کروڑ سیلاب متاثرین سنگین مصائب کا شکار ہیں، ان حالات میں حکومت سبزیوں، پھلوں، اجناس اور بجلی کی قیمتوں میں غیر معمولی اضافے کو کنٹرول کرے، کسانوں کو ریلیف دے کر اجناس کی پیدوار میں اضافہ کیا جائے۔

ملک کا ایک تہائی حصہ پانی کے نیچے ہے، 35 ملین لوگ پریشانی کا شکار ہیں
تیل، بجلی کے بعد اب آٹے، دال اور سبزیوں کی قیمتوں میں اضافہ ہورہا ہے
حکومت سبزیوں، پھلوں، اجناس اور بجلی کی قیمتوں میں غیر معمولی اضافہ کو کنٹرول کرے
کسان کو ریلیف دے کر کر اجناس کی پیداوار میں اضافہ کیا جائے

— Syed Hassan Murtaza (@S_HassanMurtaza) September 7, 2022

انہوں نے کہا کہ حکومت پیٹرول، گیس، بجلی کی قیمتوں کو کم کرنے کی طرف توجہ دے، آئی ایم ایف پر انحصار ختم کرنے کےلئے قابل عمل پالیسی تشکیل دی جائے، قوم نے اپنی بساط سے زیادہ قربانیاں دی ہیں، اب اشرفیہ کی باری ہے۔