سری لنکا کیخلاف میچ میں امپائرز نے انگلش فاسٹ بولر کو اچانک سپن بولنگ کرنے کو کیوں کہا؟

 (24نیوز) سری  لنکا کے خلاف ٹیسٹ میچ میں انگلش فاسٹ بولر کرس ووکس کو اچانک اپنے اوور میں اسپن بولنگ کرانا پڑ گئی، انگلینڈ اور سری لنکا کے درمیان تیسرا ٹیسٹ میچ اوول کے میدان پر جاری ہے جہاں 2 دن کا کھیل مکمل ہوگیا ہے۔

انگلش ٹیم پہلی اننگز میں 325 رنز بناکر آؤٹ ہوگئی تاہم جب دوسرے دن سری لنکن ٹیم بیٹنگ کرنے میدان میں آئی تو اس کی اننگز کے دوران اس وقت دلچسپ صورتحال دیکھنے میں آئی جب امپائرز نے انگلینڈ کے فاسٹ بولر کرس ووکس کو اچانک اوور کے درمیان اسپن بولنگ کرنے کا کہہ دیا،سری لنکا کی اننگز کے ساتویں اوور میں کرس ووکس بولنگ کروانے آئے، انہوں نے اپنے اوور کی 2 گیندیں روایتی انداز میں بھاگ کر ہی کروائیں لیکن پھر اچانک آن فیلڈ امپائرز جوئل ولسن اور کرس گیفانی نے ووکس کو روکا اور انہیں اسپن بولنگ کرنے کا کہا۔

جس کے بعد کرس ووکس نے اپنے اوور کی باقی 4 گیندیں سپن کروائیں، انگلش فاسٹ بولر کو  سپن کرواتا دیکھ کر ساتھی کرکٹر ہنستے دکھائی دیے، دراصل ہوا کچھ یوں کہ سری لنکن اننگز کے دوران آسمان پر اچانک کالے بادل چھاگئے اور میدان میں اندھیرا ہونے لگا، روشنی اتنی کم ہوگئی تھی کہ فاسٹ بولنگ کروانا کھیل کے لیے  بہتر نہیں تھا،اس لیے امپائرز نے اوور کے درمیان ووکس کو روکا اور باقی گیندیں اسپن کروانے کا کہا،جیسے ہی کرس ووکس کا اوور ختم ہوا، آسمان سے کالے بادل بھی چھٹ گئے جس کے بعد اگلا اوور فاسٹ بولر اٹکنسن نے ہی کروایا۔

واضح رہے کہ سری لنکا نے انگلینڈ کے 325 رنز کے جواب میں دوسرے دن کاکھیل ختم ہونے تک 5 وکٹوں پر 211 رنز بنالیے ہیں،انگلش ٹیم کو 3 میچز کی سیریز میں 0۔2 کی برتری حاصل ہے۔    

یہ بھی پڑھیں: انگلینڈ کےسابق کپتان معین علی کا انٹرنیشنل کرکٹ سے ریٹائرمنٹ کا اعلان