(24نیوز)اسلام آباد کی انسداد دہشت گردی عدالت نے 9 مئی مقدمات میں پاکستان تحریک انصاف (پی ٹی آئی) کے غیر حاضر کارکنوں کے وارنٹ گرفتاری جاری کردیئے۔
اے ٹی سی اسلام آباد کے جج طاہر عباس سپرا نے بانی پی ٹی آئی عمران خان، شاہ محمود قریشی و کارکنان کیخلاف 9 مئی احتجاج و دیگر مقدمات کی سماعت کی، ملزموں کی جانب سے سردار محمد مصروف خان ایڈووکیٹ، مرتضی طوری اور دیگر وکلا پیش ہوئے۔
بانی پی ٹی آئی عمران خان اور شاہ محمود قریشی کی عدم دستیابی کے باعث سماعت آگے نہ بڑھ سکی اور عدالت نے پیش ہونے والے ملزموں کی حاضری کے بعد سماعت ملتوی کر دی۔
اس دوران عدالت نے پی ٹی آئی کے غیر حاضر کارکنوں کے وارنٹ گرفتاری بھی جاری کر دیئے۔
وکیل صفائی نے مؤقف اختیار کیا کہ بانی پی ٹی آئی دستیاب نہیں ہیں جس کی وجہ سے کیس آگے بڑھ نہیں سکتا، کارکن دور دراز کے علاقوں سے آتے ہیں، دور سے آنے والے کارکنان کو حاضری سے استثنیٰ دیا جائے۔
جج نے ریمارکس دیئے کہ سپریم کورٹ نے کل 9 مئی مقدمات کے حوالے سے ہدایات دی ہیں اور سپریم کورٹ کی ہدایات اس کیس کے لیے بھی ہیں جس پر وکیل صفائی نے کہا کہ سپریم کورٹ کی ہدایات پنجاب کی حد تک ہیں۔
بعدازاں اے ٹی سی اسلام آباد نے پیش ہونے والے ملزموں کی حاضری کے بعد تینوں مقدمات کی سماعت 9 مئی تک ملتوی کر دی۔
یادرہے کہ پی ٹی آئی کارکنان پر تھانہ شمس کالونی میں 9 مئی واقعات پر مقدمہ درج ہے، اور تھانہ کھنہ میں مارچ 2023 میں احتجاج کے مقدمات درج ہیں۔