عمران خان نے پی آئی اے کو تباہ کیا، شہباز شریف نے منافع بخش بنایا: خواجہ آصف

(24نیوز)وفاقی وزیر دفاع خواجہ آصف نے کہا ہے کہ عمران خان نے پی آئی اے کو تباہ کیا جبکہ شہباز شریف نے منافع بخش بنایا ہے۔

سماجی رابطے کی ویب سائٹ ایکس پر اپنے پیغام میں خواجہ آصف کا کہنا تھا کہ بانی پی ٹی آئی نے پی آئی اے کو تباہ کرنے میں کوئی کسر نہیں چھوڑی تھی، 21 سال بعد پی آئی اے پھر سے اربوں کا منافع بخش ادارہ بن گیا، شہباز شریف نے قیادت سنبھالی تو یورپین روٹ بحال ہوئے، پی ٹی آئی دور میں پی آئی اے کا خسارہ اور قرض آسمان تک پہنچ گیا تھا، یورپین روٹ، برطانیہ کیلئے آپریشن بند ہوگیا تھا، لاجواب پرواز قصہ پارینہ بن گئی تھی۔

 خواجہ آصف نے کہا کہ برطانیہ کیلئے پی آئی اے فلائٹسں کی بحالی بھی زیادہ دور نہیں ہے، شہباز شریف کی نیت اور محنت اللہ قبول کر رہا ہے،وفاقی وزیر دفاع کا مزید کہنا تھا کہ قومی ادارہ ایک دفعہ پھر سبز ہلالی پرچم کا پاسبان بن گیا، چیئرمین پی آئی اے، ان کی ٹیم اور تمام ملازمین قابل تحسین ہیں۔