(ویب ڈیسک) اطالوی جزیرے لیمپیڈوسا کے قریب ایک کشتی ڈوبنے سے 41 تارکین وطن ہلاک ہوگئے ہیں۔
عالمی میڈیا رپورٹس کے مطابق کشتی میں تین بچوں سمیت 45 افراد سوار تھے، کشتی میں ڈوبنےسے بچ جانے والے چار افراد نے امدادی ٹیم کو بتایا کہ وہ ایک کشتی پر سوار تھے جو تیونس کے شہر سفیکس سے روانہ ہوئی تھی اور اٹلی جاتے ہوئے ڈوب گئی۔
ان کا کہنا تھا کہ کشتی گزشتہ ہفتے جمعرات کو سفیکس سے نکلی تھی لیکن ایک بڑی لہر کی زد میں آنے کے بعد چند ہی گھنٹوں میں ڈوب گئی، 15 افراد نے لائف واسکٹ پہن رکھی تھی۔
انھوں نے مزید کہا کہ انھیں ایک مال بردار جہاز نے بچایا اور پھر انھیں اطالوی کوسٹ گارڈ کے جہاز میں منتقل کردیا گیا۔ بچ جانے والے چارافراد کوبدھ کے روز لیمپیڈوسا پہنچا دیا گیا۔
یہ بھی پڑھیے: ایران میں احتجاج کےدوران 100 سے زائد صحافی گرفتار
اطالوی کوسٹ گارڈ نے اتوار کو اس علاقے میں دو بحری جہازوں کے تباہ ہونے کی اطلاع دی تھی لیکن یہ واضح نہیں ہے کہ آیا یہ جہاز ان میں سے ایک ہے یا نہیں۔
دوسری جانب تیونس کے حکام کا کہنا ہے کہ لامپیڈوسا سے تقریباً 80 میل (130 کلومیٹر) دور ایک بندرگاہی شہر سفیکس یورپ میں حفاظت اور بہتر زندگی کے خواہاں تارکین وطن کیلئے ایک مقبول مقام ہے۔
خیال رہے کہ شمالی افریقہ سے یورپ جانے والے راستے میں اس سال اب تک 1800سے زائد افراد اپنی جانیں گنوا چکے ہیں۔