(24نیوز)غزہ پر اسرائیلی بربریت رکنے کانام نہیں لے رہی، اسرائیلی فوج کے تازہ حملوں میں مزید 60 سے زائد فلسطینی شہید ہوگئے۔
غیر ملکی میڈیا رپورٹس کے مطابق اسرائیلی طیاروں نے شجاعیہ میں مواصلاتی کمپنی پر فضائی حملہ کیا جس میں ٹاور پر کام کرتے 4 ملازمین شدید زخمی ہوئے,مقبوضہ مغربی کنارے میں بھی اسرائیلی فوج کی فائرنگ سے 2 بچوں سمیت 3 فلسطینی شہید ہوئے۔
فلسطینی وزارت صحت کے مطابق غزہ میں پچھلے 24 گھنٹوں کے دوران اسرائیلی حملوں میں مزید 60 سے زائد فلسطینی شہید ہوگئے ہیں,غزہ کے رہائشی علاقوں پر بھی اسرائیلی حملے جاری ہیں جس کے نتیجے میں مزید 40 فلسطینی شہید ہوگئے ہیں۔
دوسری جانب شمالی غزہ میں حماس کے حملے میں 3 اسرائیلی فوجی بھی مارے گئے۔
دوسری طرف اسرائیلی فوج کاکہناہے کہ بدھ کے روز شمالی غزہ میں لڑائی کے دوران اس کے3 فوجی ہلاک ہو گئے، جس سے فلسطینی علاقے میں اس کے جانی نقصان کی تعداد 399 ہو گئی ہے،اس کے علاوہ ایک اسرائیلی فوجی زخمی بھی ہوا۔
یہ بھی پڑھیں:امریکامیں برفانی طوفان نے تباہی مچادی،نظام زندگی مفلوج،سکول ودفاتربند
اُدھر غزہ سے یرغمالیوں کی رہائی کرانے کیلئے اسرائیلیوں نے احتجاج کیا اور تل ابیب کی سڑکیں بند کرکے نیتن یاہو حکومت سے غزہ جنگ فوری بند کرنے اور یرغمالیوں کو واپس لانے کا مطالبہ کیا۔
امریکی وزیر خارجہ بلنکن کا کہنا ہے کہ جنگ بندی معاہدے کے بہت قریب ہیں، یہ ہم نہ کر پائے تو آنے والی انتظامیہ صدر بائیڈن کے دیے گئے معاہدے کو آگے بڑھائے گی۔