ہانیہ عامر نے انسٹاگرام پر تمام پاکستانی فنکاروں کو پیچھے چھوڑ دیا

( ویب ڈیسک)پاکستان کی مشہور اداکارہ اور ڈرامہ 'کبھی میں کبھی تم' کی معروف اسٹار ہانیہ عامر نے ایک مرتبہ پھر انسٹاگرام پر سب سے زیادہ فالو کی جانے والی پاکستانی سیلیبرٹی کا اعزاز حاصل کر لیا ہے۔

ہانیہ عامر نے 14 ملین فالوورز کا سنگ میل عبور کر کے اپنا ہی ریکارڈ توڑ دیا ہے جس سے پہلے یہ اعزاز اداکارہ عائزہ خان کے پاس تھا۔ ہانیہ کی توانائی، دلکش انداز اور متاثر کن مواد انہیں نوجوانوں میں خاص طور پر مقبول بناتے ہیں۔

ہانیہ اپنے روایتی اور جدید فیشن کے امتزاج کے باعث ہمیشہ مداحوں کی توجہ کا مرکز بنی رہتی ہیں چاہے وہ اپنے شاندار لباس کی تصاویر شیئر کریں یا اسکن کیئر ٹپس، ہر پوسٹ ان کے فالوورز کو متاثر کرتی ہے۔

ڈرامہ 'میرے ہمسفر' اور 'کبھی میں کبھی تم' میں شاندار اداکاری کے ذریعے ہانیہ نے اپنے شائقین کے دل جیت لیے ہیں ان کے ہر پروجیکٹ کو بے حد پذیرائی حاصل ہوتی ہے اور وہ پاکستانی شوبز انڈسٹری میں اپنی جگہ مضبوط کر چکی ہیں۔

ہانیہ عامر کو سی این این نے "پاکستان میں جنریشن زی کی پہچان" قرار دیا ہے اور وہ "دنیا کے ٹاپ 50 ایشیائی سیلبریٹیز" میں نویں نمبر پر ہیں۔

بھارتی شائقین بھی ہانیہ عامر کو بے حد پسند کرتے ہیں اور ان کی بادشاہ کے ساتھ دوستی اکثر خبروں کی زینت بنتی رہتی ہے۔ لندن میں دلجیت دوسانجھ کے کنسرٹ کے دوران اسٹیج پر ان کا یادگار لمحہ دونوں ممالک کے مداحوں کو حیرت میں ڈالنے کا باعث بن گیا۔

یہ بھی پڑھیں:پی سی بی نے قومی ڈومیسٹک کرکٹ ٹورنامنٹس کے شیڈول کا اعلان کر دیا