ڈسکہ الیکشن اہمیت کا حامل،بھاری مارجن سے فتح درکار ہے،حمزہ شہباز

(24نیوز)مسلم لیگ (ن) کے رہنما حمزہ شہباز نے کہاکہ ڈسکہ الیکشن بہت اہمیت کا حامل ہے اور اس میں بھاری مارجن سے فتح درکار ہے۔مخالفین کو عبرتناک شکست سے دوچار کریں گے۔

ڈسکہ کے ضمنی الیکشن کے حوالے سے مسلم لیگ (ن) سیالکوٹ کی تنظیم کا اجلاس لاہور ماڈل ٹاؤن میں ہوا جس میں حمزہ شہباز، احسن اقبال، سعد رفیق اور رانا ثناء اللہ سمیت دیگر نے شرکت کی۔ ذرائع کے مطابق اجلاس میں رانا ثناء اللہ کو ضمنی انتخاب کے لئے ارکان اسمبلی اور رہنماؤں کی ٹیم بنانے کی ہدایت کی گئی جبکہ حمزہ شہباز ڈسکہ ضمنی انتخاب کے حوالے سے خود بھی میدان میں اتریں گے۔اجلاس میں این اے 75 سے (ن) لیگ کی امیدوار نوشین افتخار کو بھی آن بورڈ لیا گیا اس موقع پر حمزہ شہباز نے نوشین افتخار سے گفتگو کرتے ہوئے کہا کہ گھبرائیں نہیں، ہم سب آپ کے ساتھ ہیں۔ڈسکہ الیکشن کو کامیاب بنانے کےلئے سب کو مل جل کر آگے بڑھنا ہوگا۔