(24نیوز)وزیر اعظم کے مشیر رانا ثناء اللّٰہ خان نے کہا کہ سانحہ 9 مئی کے ملزموں کو اب تک سزا مل جانی چاہیے تھی، انہیں سزائیں اب تک نہ ہونا ہمارے نظام پر سوالیہ نشان ہے۔
وزیرِ اعظم کے مشیر رانا ثناء اللّٰہ نےمیڈیا سے گفتگو کرتے ہوئے نے کہا کہ آج کا کابینہ اجلاس خصوصی طور پر 9 مئی کے واقعات کی مذمت کیلئے ہے،ان کا کہنا ہے کہ اس واقعے کی مذمت کرتے ہیں، جن لوگوں نے یہ مجرمانہ عمل کیا انہیں اب تک سزا نہیں ہوئی، جب کسی کو جیل میں رکھنا مقصود ہے تو یہی کافی ہے، سہولت دینا نہ دینا معنی نہیں رکھتا۔
رانا ثناء اللّٰہ نے کہا کہ پہلے برسرِ اقتدار لوگ جیل جانے والوں کو اذیت دینے کا کہتے تھے وہ قابلِ مذمت ہے،وزیرِ اعظم کے مشیر کا کہنا ہے کہ جیل میں بانیٔ پی ٹی آئی کو جو سہولتیں دی گئی ہیں ان پہ قطعی کوئی اعتراض نہیں، بانیٔ پی ٹی آئی کے پاس جو منصب رہا ہے اس کے مطابق اگر سہولتیں ہیں تو اعتراض نہیں۔
انہوں نے مزید کہا کہ اس معاملے پر کوئی فیصلہ نہیں ہو رہا، کئی کئی سال کیس چلتے ہیں یہ ہمارے عدالتی نظام کے نقائص ہیں، کیسز کے جلد نمٹانے سے متعلق قانون سازی ہونا چاہیے۔
ایک صحافی نے ان سے سوال کیا کہ بانیٔ پی ٹی آئی معافی کو تیار نہیں بلکہ کہتے ہیں کہ مجھ سے معافی مانگی جائے،وزیر اعظم کے مشیر رانا ثناء اللّٰہ خان نے جواب دیا کہ یہ ان کی ہٹ دھرمی، ڈھٹائی ہے اور غیر جمہوری ہونا ہی اصل مسئلے کی جڑ ہے۔