بھارت چیمپئنز ٹرافی کیلئے پاکستان نہیں جائیگا، بی سی سی آئی نے آئی سی سی کو مطلع کر دیا

(24 نیوز ) چیمپئنز ٹرافی 2025 کیلئے بھارتی کرکٹ ٹیم کے پاکستان نہ جانے کی خبریں  ایک عرصہ سے بھارتی میڈیا پر چل رہی تھیں لیکن اب آفیشل طور پر بھارتی کرکٹ بورڈ (بی سی سی آئی ) نے آئی سی سی کو مطلع کر دیا ہے ۔

کرکٹ کے حوالے سے مشہور ویب سائیٹ ’کرک انفو ‘ کا کہنا ہے کہ بھارت کے کرکٹ بورڈ نے انٹرنیشنل کرکٹ کونسل کو باضابطہ طور پر بتادیا ہے کہ بھارتی کرکٹ ٹیم چیمپینز ٹرافی کے میچ کھیلنے کے لیے پاکستان نہیں جائے گی،بھارتی کرکٹ بورڈ نے آئی سی سی کو حکومت کی طرف سے اجازت نہ ملنے کا سبب بتایا ہے، بھارتی ٹیم ہائبرڈ ماڈل پر ایونٹ میں شرکت کی خواہش مند ہے، اس کے لیے سری لنکا اور متحدہ عرب امارات کے وینیوز پر غور کیا جارہا ہے۔

گزشتہ روز بھارتی میڈیا پر خبریں چلنے کے بعد پاکستان کرکٹ بورڈ کے چیئرمین محسن نقوی نے کہا تھا کہ بھارتی میڈیا تو یہ بات کم و بیش 2ماہ سے کہہ رہے ہیں ،جب کبھی تحریری طور پر کوئی بات آئی تو لائحہ عمل کیلئے حکومت سے رابطہ کریں گے۔