بالی ووڈ فلم ’’پُھلے‘‘  تنازع کا شکار، ریلیز 2 ہفتوں کیلئے موخر

(ویب ڈیسک) بھارت کی فلم انڈسٹری  بالی ووڈ میں ساوتری بائی اور جیوتی باپھلے کی زندگی پر مبنی  بننے والی فلم ’’پُھلے‘‘ ریلیز ہونے سے قبل  تنازع کا شکار ہو گئی۔ سینسر بورڈ نے ’’پھلے‘‘ میں کئی ترامیم کا مطالبہ کیا، فلمسازوں نے ریلیز مؤخر کردی۔ اب یہ فلم 11اپریل کے بجائے25؍ اپریل  کو ریلیز ہوگی۔
 بھارتی ذرائع ابلاغ کے مطابق پرتیک گاندھی اور پترلیکھا کی آنے والی فلم ’’پھلے‘‘ کی ریلیز متعدد تنازعات کی وجہ سے ملتوی کر دی گئی ہے۔ اطلاعات کے مطابق فلم نے برہمن برادری کو ناراض کیا ہے، اور یہ الزام لگایا ہے کہ یہ ذات پرستی کو فروغ دیتی ہے۔ سینٹرل بورڈ آف فلم سرٹیفیکیشن (سی بی ایف سی) نے فلمسازوں سے کہا ہے کہ وہ ریلیز سے قبل فلم میں متعدد ترمیم کریں۔ ’’پھلے‘‘2 ہفتوں کے بعد یعنی11 اپریل کے بجائے 25اپریل کو ریلیز ہوگی۔ اس ضمن میں برہمن فیڈریشن کے صدر آنند دیوے نے دعویٰ کیا کہ فلم ذات پرستی کو فروغ دیتی ہے۔ انہوں نے یہ بھی مطالبہ کیا کہ پھلے (ساوتری بائی اور جیوتی با) کی مدد میں ’سیاہ برہمن‘ برادری کے تعاون کو بھی تسلیم کیا جائے۔ تنازع کے درمیان، سابق ریاستی وزیر چھگن بھجبل نے تنازع کو حل کرنے کیلئے ڈائریکٹر اننت مہادیون اور پروڈیوسروں سے ملاقات کی ہے۔

سینٹرل بورڈ آف فلم سرٹیفیکیشن نے فلمساز کو فلم میں متعدد تبدیلیاں کرنے کو کہا ہے جن میں ذات پات کے نظام کا حوالہ دینے والے وائس اوور کو ہٹانا بھی شامل ہے۔ انہوں نے کئی الفاظ اور اصطلاحات بھی تبدیل کرنے کیلئے کہا ہے۔ بعض مکالموں میں ردوبدل کی بھی تجویز دی گئی ہے۔  اننت مہادیون نے بھارتی نجی ٹی وی چینل سے بات چیت میں کہا کہ میں صرف ان کے دماغ سے ان چھوٹے چھوٹے جالوں کو صاف کرنا چاہتا ہوں۔ ٹریلر دیکھ کر فلم کے بارے میں مکمل طور پر فیصلہ کرنے کا طریقہ درست نہیں ہے۔ کہیں نہ کہیں، سب کو احساس ہے کہ ذات پات جیسی سماجی برائیاں ابھی تک حل نہیں ہوئی ہیں۔ اگرچہ ہم نے اب خواتین کو تعلیم کی اجازت دی ہے مگر اب بھی صنفی تفریق باقی ہے۔اس ضمن میں پرتیک گاندھی نے کہا تھا کہ ان دنوں بہت مشکل ہے کہ کوئی بھی کسی بھی بات سے ناراض ہو جاتا ہے، آپ آج کے دور میں، خاص طور پر سوشل میڈیا کے دور میں کبھی اندازہ نہیں لگا سکتے۔ لوگوں کے پاس کچھ بھی کرنے اور کچھ بھی کہنے کی طاقت ہے اور اس طاقت کا بڑے پیمانے پر غلط استعمال کیا جا رہا ہے۔ نڈر ہونا ہی اس کا واحد جواب ہے۔
 واضح رہے کہ فلم ’’پھلے‘‘ میں پرتیک گاندھی جیوتی راؤ پھلے اور پترلیکھاساوتری بائی پھلے کے کردار  ادا کررہی ہیں۔فلم’’پھلے‘‘ سماجی مصلح جیوتی راؤ پھلے اور ان کی اہلیہ ساوتری بائی پھلے کی زندگی پر مبنی فلم ہے، جنہوں نے پیدائشی حق کے طور پر مساوات اور تعلیم کو فروغ دینے کیلئےانتھک محنت کی۔ 

یہ بھی پڑھیں: لڑکے کے ساتھ بدفعلی اور ویڈیو بنا کر وائرل کرنے والے ملزم کا علاقے میں مٹر گشت