ارشد ندیم کو خراج تحسین پیش کرنے کیلئے یوم آزادی کے موقع پر خصوصی ڈاک ٹکٹ جاری

(راو  دلشاد) قوم کا سر فخر سے بلند کرنے والے اولمپک گولڈ میڈلسٹ ارشد ندیم کو خراج تحسین پیش کرنے کیلئے ویراعظم شہباز شریف کی خصوصی ہدایت پر ملک کے 77  ویں یوم آزادی کے موقع پر ”عزم استحکام“ کے عنوان سے خصوصی ڈاک ٹکٹ جاری کیا گیا ہے جس پر  پاکستانی ایتھلیٹ کی تصویر شائع کی گئی ہے ۔

ارشد ندیم نے پیرس اولمپکس میں 92.97 میٹر فاصلے پر نیزہ پھینک کر نیا اولمپک ریکارڈ قائم کر کے گولڈ میڈل حاصل کیا اور نوجوان نسل کے لئے ایک مثال بن گئے ہیں،ڈاک ٹکٹ کو عزم استحکام کا عنوان دیا گیا ہے جو ملک کی ترقی اور استحکام کے عزم کا منہ بولتا ثبوت ہے،ڈاک ٹکٹ میں مینار پاکستان کی تصویر کو شامل کر کے پاکستان کی آزادی کی جدوجہد اور اس کی علامتی اہمیت کو بھی اجاگر کیا گیا ہے۔

 حکومت پاکستان کی جانب سے یوم آزادی کے موقع پر جاری کردہ ڈاک ٹکٹ آنے والی نسلوں کو پاکستان کی آزادی کی جدوجہد، قربانیوں اور حکومت پاکستان کی ملکی استحکام کے لئے جدوجہد اور عزم سے آگاہ کرے گا۔