مہنگائی کو کنٹرول نہ کیا تو ہر قسم کی پرفارمنس ختم ہو جائے گی‘ پرویزالٰہی 

(24نیوز) سپیکر پنجاب اسمبلی چودھری پرویزالٰہی سے پولیٹیکل کوآرڈی نیٹر سپیکر پنجاب اسمبلی و صدر مسلم لیگ راولپنڈی زبیر احمد خان نے وفد کے ہمراہ ملاقات کی اور موجودہ سیاسی صورتحال کے حوالے سے ہدایات لیں۔

تفصیلات کے مطابق وفد میں پولیٹیکل کوآرڈینٹر چودھری شجاعت حسین و جنرل سیکرٹری مسلم لیگ راولپنڈی فیاض تبسم، شہباز گوشی مرکزی نائب صدر، انجم کیانی صدر مسلم لیگ گجر خان اور چودھری بلال وڑائچ شامل تھے۔ چودھری پرویزالٰہی نے وفد سے گفتگو کرتے ہوئے کہا کہ اس وقت مہنگائی کی وجہ سے عوام کو دو وقت کی روٹی کے لالے پڑے ہوئے ہیں صرف زبانی جمع خرچ کرنے کی بجائے عوام کو ریلیف دینے کیلئے عملی اقدامات کرنا پڑیں گے۔

یہ بھی پڑھیں:انسانی حقوق کی پاسداری کے لیے جمہوری روایات کو پروان چڑھانا ضروری ،بلاول کا انسانی حقوق کے عالمی دن پر پیغام

انہوں نے کہا کہ ہمارا مذہب بھی انسانیت کا درس دیتا ہے عوام کو ریلیف دینا ہی دراصل انسانیت کی خدمت ہے۔ چودھری پرویزالٰہی نے کہا کہ اس وقت مہنگائی کنٹرول کرنے کیلئے جامع پلان بنانے کی ضرورت ہے، حکومت جان لے کہ اگر مہنگائی کو کنٹرول نہ کیا توساری پرفارمنس ختم ہو جائے گی۔ انہوں نے کہا کہ کراچی میں اومی کرون کے مزید کیس سامنے آنے پر صوبوں کو فوری طور پر احتیاطی تدابیر پر عمل کرنا ہو گا۔ چودھری پرویزالٰہی نے زبیر احمد خان پر بھرپور اعتماد کا اظہار کرتے ہوئے ان کی کارکردگی کو سراہا۔ اس موقع پر زبیر احمد خان نے راولپنڈی کے کنٹونمنٹ بلدیاتی الیکشن اور تنظیم سازی کے حوالے سے رپورٹ پیش کی۔ انہوں نے چودھری پرویزالٰہی کو راولپنڈی میں نئے پارٹی سیکرٹریٹ کے افتتاح کی دعوت بھی دی۔

یہ بھی پڑھیں: شیخ رشید احمد کی آسٹریلوی ٹیم کی فول پروف سیکیورٹی کی یقین دہانی