بادل برسانے والا سسٹم ملک میں داخل، کئی مقامات پربارش کاامکان

(اقصیٰ شاہد،عیسٰی ترین) پنجاب کے بیشتراضلاع میں بادل برسانے والا سسٹم داخل ہو گیا،محکمہ موسمیات کی جانب سےاسلام آباد سمیت کئی مقامات پربارش کی پیشگوئی کردی گئی ہے۔

محکمہ موسمیات کا کہنا ہے کہ شمال مغربی بلوچستان،بالائی خیبر پختونخوا،آزاد کشمیر اور گلگت بلتستان میں مطلع جزوی ابر آلود رہنے کے علاوہ چند مقامات پرہلکی بارش اوربرف باری کی توقع ہے۔

علاوہ ازیں محکمہ موسمیات نے مری، گلیات ، گرد و نواح اور سندھ کے بیشتر اضلاع میں موسم خشک اور سرد رہنے کی پیشگوئی کی ہے۔

گزشتہ روز کم سے کم درجہ حرارت لہہ میں منفی  12، سکردو، استور، گوپس میں منفی 6، کالام میں منفی 5، ہنزہ میں منفی 4، بگروٹ، گلگت میں منفی 3 ڈگری سینٹی گریڈ ریکارڈ کیا گیا۔

وادی نیلم کے بالائی علاقوں میں وقفے وقفے سے ہلکی برفباری ہورہی ہے جبکہ زیریں علاقوں میں مطلع اَبر آلودہے، شاہراہ نیلم مظفرآباد سے کیل تک ہر قسم کی ٹریفک کیلئے بحال کردی گئی ہے۔

کراچی کے موسم نے ایک بار پھر انگڑائی لی اورآج سے دن کے اوقات میں درجہ حرارت میں ایک سے دو ڈگری کا اضافہ متوقع ہے، محکمہ موسمیات کے مطابق شہر میں آج زیادہ سے زیادہ درجہ حرارت 30 ڈگری سینٹی گریڈ تک جانے کا امکان ہے۔

محکمہ موسمیات کے مطابق آج سے شہر میں رات کا درجہ حرارت بھی بڑھے گا،شہرمیں اس وقت موسم سرد اور خشک ہےجبکہ دن میں گرمی  کی شدت محسوس کی جاسکتی یے،موجودہ درجہ حرارت 15 ڈگری سینٹی گریڈ ہے،ہوا میں نمی کا تناسب 88فیصد ہے۔

اے کیو آئی کے مطابق دنیا کے آلودہ ترین شہروں میں کراچی دسویں اورپاکستان کے آلودہ ترین شہروں میں آٹھویں نمبر پر موجودہے،ہوا میں آلودہ ذرات کی مقدار 99 پرٹیکیولیٹ میٹرز ریکارڈکی گئی ہے۔

کراچی کے آلودہ ترین علاقوں میں سر فہرست شاہ فیصل، دوسرے نمبر پر کورنگی، تیسرے نمبر پر گلشن اقبال موجود ہیں۔

بلوچستان کے بیشتراضلاع میں موسم خشک اور سرد رہے کا امکان ہے، محکمہ موسمیات کے مطابق کوئٹہ اوربلوچستان کے شمالی اضلاع میں مطلع جزوی طور پر آبر آلو رہے گاجبکہ کوئٹہ، زیارت، پشین اور قلعہ عبداللہ میں چند مقامات پر بارش اور برفباری کا امکان ہے۔

یہ بھی پڑھیں:قومی اسمبلی کااجلاس آج شام 5بجے ہو گا،13نکاتی ایجنڈا جاری

 محکمہ موسمیات کاکہناہے کہ کوئٹہ اور قلات میں کم سے کم درجہ حرارت صفر ڈگری سینٹی گریڈ ریکارڈکیاگیاہے،زیارت میں کم سے کم درجہ حرارت منفی 1 اور ژوب میں 3 ڈگری سینٹی گریڈ ریکارڈکیاگیا،سبی میں کم سے کم درجہ حرارت 11 اور تربت میں 13 ڈگری سینٹی گریڈ ریکارڈکیاگیا،نوکنڈی میں کم سے کم درجہ حرارت 9 اور چمن میں 4 ڈگری سینٹی گریڈ ریکارڈ کیاگیا۔

گوادر میں کم سے کم درجہ حرارت 12 اور جیوانی میں 14 ڈگری سینٹی گریڈ ریکارڈکیاگیاہے۔