خستہ اور چٹپٹی فرائی فش بنانے کا بہترین طریقہ

 (ویب ڈیسک)مچھلی میں موجود اعلیٰ معیاری پروٹین، آیوڈین، سلینیم اور زنک جیسے اہم غذائی اجزاء ہر عمر کے افراد کے لیے فائدہ مند ہیں,اس کے علاوہ، مچھلی وٹامن D اور وٹامن B12 کا بہترین ذریعہ ہے، جو ہڈیوں کی مضبوطی اور دماغی صحت کے لیے نہایت ضروری سمجھے جاتے ہیں۔ اس کی سب سے خاص بات اومیگا 3 فیٹی ایسڈ کی موجودگی ہے، جو دل اور دماغ کے لیے بے حد مفید ہے۔

فرائی فِش ایک مزیدار اور کرنچی ڈش ہے جو ہر کسی کو پسند آتی ہے, یہاں ایک بہترین اور آسان ریسپی دی جا رہی ہے جس سے آپ ہوٹل جیسی خستہ دار اور چٹپٹی فرائی فش گھر پر بنا سکتے ہیں۔
اجزاء:
مچھلی (رہو، سرمئی، پاپلیٹ یا کوئی بھی) – ½ کلو (صاف اور دھوئی ہوئی)
لیموں کا رس – 2 کھانے کے چمچ
ادرک لہسن کا پیسٹ – 1 کھانے کا چمچ
لال مرچ پاؤڈر – 1 چائے کا چمچ
نمک – حسب ذائقہ
ہلدی – ½ چائے کا چمچ
دھنیا پاؤڈر – 1 چائے کا چمچ
زیرہ پاؤڈر – 1 چائے کا چمچ
گرم مصالحہ پاؤڈر – ½ چائے کا چمچ
اجوائن – ½ چائے کا چمچ (ہضم کے لیے فائدہ مند)
چاول کا آٹا یا کارن فلور – 2 کھانے کے چمچ (کرنچی بنانے کے لیے)
بیسن – 2 کھانے کے چمچ (مزید خستہ بنانے کے لیے)
پانی – حسب ضرورت (گاڑھا آمیزہ بنانے کے لیے)
تیل – تلنے کے لیے

ترکیب:
1.مچھلی کے پیسز کو اچھی طرح دھو کر خشک کرلیں۔
2.ایک پیالے میں لیموں کا رس، ادرک لہسن کا پیسٹ، لال مرچ، ہلدی، دھنیا پاؤڈر، زیرہ پاؤڈر، گرم مصالحہ، اجوائن اور نمک ڈال کر اچھی طرح مکس کریں۔
3.اس میں چاول کا آٹا، بیسن اور تھوڑا سا پانی ڈال کر گاڑھا آمیزہ بنا لیں تاکہ مچھلی پر اچھی طرح لگ سکے۔
4.مچھلی کے ٹکڑوں کو اس مصالحے میں 1 سے 2 گھنٹے کے لیے میرینیٹ کریں تاکہ ذائقہ بہتر ہو۔
5.ایک کڑاہی میں تیل گرم کریں اور مچھلی کے ٹکڑوں کو درمیانی آنچ پر سنہری اور کرنچی ہونے تک تلیں۔
6.جب مچھلی خستہ اور سنہری ہوجائے تو نکال کر جاذب کاغذ پر رکھ دیں تاکہ اضافی تیل نکل جائے۔
7.مزیدار فرائی فش کو گرم گرم نان، چٹنی اور سلاد کے ساتھ سرو کریں۔