متنازع بیانات :عرفان کھوسٹ نے فردوس جمال کو اہم مشورہ دےدیا

 (ویب ڈیسک) سینئر اداکار عرفان کھوسٹ نے متنازع بیانات کی وجہ سے تنقید کانشانہ بننے والے ساتھی اداکار فردوس جمال کو اہم مشورہ دےدیا۔

عرفان کھوسٹ نے حال ہی میں ایک ویب شو میں بطور مہمان شرکت کی جہاں مختلف موضوعات پردلچسپ گفتگو کی۔

عرفان کھوسٹ نے فردوس جمال کے بارے میں بات کرتے ہوئے کہا کہ دراصل بات یہ ہے کہ انسان خود ہی اپنا صحیح محاسبہ کرسکتا ہے اور اگر انسان خود کو بہت زیادہ اچھا اور عقلِ کُل سمجھنے لگتا ہے تو یہ نقصان دہ ہے۔

سینئراداکارنے کہا کہ فردوس جمال ایک شاندار اورمحنتی فنکار ہیں لیکن مجھے لگتا ہے کہ وہ ابھی ڈپریشن شکار ہیں،میں نے فردوس جمال کو پیار سے سمجھایا ہے کہ ابھی شوبز انڈسٹری میں جتنے بھی لوگ کام کر رہے ہیں ہمیں ان کا محاسبہ کرنے کا کوئی حق نہیں کیونکہ ان میں کوئی بات تو لازمی ہو گی جس کی وجہ سے وہ کام کر رہے ہیں اور بطور سینئر اداکار ہمیں عزت بھی دیتے ہیں لیکن اگر ان میں سے کوئی ہمیں عزت نہیں بھی دیتا تو ہم خود کو اس پر مسلط نہیں کر سکتے۔

عرفان کھوسٹ نے کہا کہ فردوس جمال کو شوبز میں کام کرنے والی لڑکیوں کے بارے میں نامناسب گفتگو بھی نہیں کرنی چاہیے کیونکہ اب وہ دور آ گیا ہے جب شادی شدہ لڑکیاں بھی کام کررہی ہیں کیونکہ اب حالات ایسے نہیں رہے کہ ایک بندہ کمائے اور پورا خاندان بیٹھ کر کھائے اس لیے میاں بیوی دونوں کو مل کر گھر چلانے کے لیے کام کرنا پڑتا ہے۔

یہ بھی پڑھیں:چاقو حملے کے بعد سازشی نظریات پر سیف علی خان بول پڑے

انہوں نے کہا کہ ایک مسئلہ یہ بھی ہے کہ اب میں اور فردوس جمال عمر کے جس حصّے میں ہیں اس میں انسان تنہا رہے تو چڑچڑا بھی ہو جاتا ہے۔