بالی ووڈ اداکارپربھاس نےاب تک کا سب سے بڑامعاہدہ کرلیا

(ویب ڈیسک)فلم"باہوبلی"سے شہرت کی بلندیوں کو چھونے والے بالی ووڈ اداکار پربھاس نے اب تک کا سب سے بڑا معاہدہ  کرلیا۔

پربھاس کی نئی فلم" کالکی اے ڈی 2898" نے ریلیز کے ساتھ ہی باکس آفس پر کئی ریکارڈ توڑ دیئے ہیں،اس فلم کی باکس آفس پر کامیابی کی دیگر وجوہات میں ایک بڑی وجہ اداکار پربھاس کی جاندار اداکاری ہے جسے شائقین بہت پسند کررہے ہیں۔

بھارت کی مقامی ویب سائٹ" تیلگو 360" کی ایک رپورٹ کے مطابق اداکار پربھاس نے ہومبلے فلمز پروڈکشن ہاؤس کے ساتھ اپنے کیریئر کا اب تک کا سب سے بڑا معاہدہ کرلیا ہے جس پردستخط بھی ہوچکے ہیں۔

معاہدے کے تحت پروڈکشن ہاؤس تین فلمیں بنائے گا جن میں پربھاس کا کردار مرکزی ہوگا، یہ وہی پروڈکشن ہاؤس ہے جس نے کے جی ایف، کانتارا اور سالار جیسی سپر ہٹ فلمیں تیار کی ہیں۔

پربھاس کے ساتھ معاہدے پر ہومبلے فلمز نے مسرت کا اظہارکرتے ہوئے کہاہے کہ پربھاس کے ساتھ ہمارا سفر ویسے تو لامحدود ہے، تاہم معاہدے کے تحت ہمارا سفر "سالار 2 "سے شروع ہوگا۔

واضح رہے کہ "سالار2 "دراصل پہلی فلم کا سیکوئل ہے جسے اگلے سال ریلیز کیا جائے گا جبکہ دیگر دو فلمیں 2027ء اور 2028 ءمیں ریلیز کی جائیں گی جن کو لوکیش کناگراج اور پرشانت ورما ڈائریکٹ کریں گے۔