(24 نیوز)پنجاب کے 170 محکموں میں سرکاری ادائیگیوں کے لیے آن لائن بلنگ سلوشن متعارف کروا دیا گیا۔اکاؤنٹنٹ جنرل پنجاب(اے جی آفس) نے ڈیجیٹل تبدیلی کی جانب اہم قدم اٹھاتے ہوئے پنجاب حکومت کے 170 سے زائد محکموں سرکاری ادائیگیوں کے لئے آن لائن بلنگ سلوشن (OLBS) کامیابی سے نافذ کر دیا ہے۔
پراجیکٹ سہل کے تحت یہ اقدام عوامی مالیاتی نظم و نسق کو جدید بنانے میں ایک اہم سنگِ میل ہے جو شفافیت، جوابدہی اور کارکردگی کو فروغ دیتا ہے۔منصوبے کا آغاز لاہور سے کیا گیا، جہاں پنجاب حکومت کے 170 سرکاری محکموں کو آن لائن بلنگ سلوشن (OLBS) پر عملی تربیت فراہم کی گئی۔
یہ تربیت محترمہ فائقہ خورشید، ایڈیشنل اے جی (پے رولز)، اے جی پنجاب کی نگرانی میں دی گئی، جبکہ تربیتی سیشن کی قیادت محترمہ اقصیٰ لوڌی، ڈپٹی اے جی (ایم آئی ایس) نے کی۔
لاہور میں جن بڑے محکموں نے آن لائن بلنگ سلوشن پر کامیابی سے منتقلی کی اُن میں ہوم ڈیپارٹمنٹ، سروسز و جنرل ایڈمنسٹریشن ڈیپارٹمنٹ ، فنانس ڈیپارٹمنٹ، ڈی آئی جی آپریشنز اور آئی جی آفس لاہور شامل ہیں۔