گورننس کی بہتری کیلئے ماہرین کی تعیناتی سے فیصلہ سازی کے عمل میں بہتری آئیگی،وزیراعظم 

(اویس کیانی)وزیراعظم شہبازشریف نے کہاہے کہ وزیراعظم شہباز شریف کے ادارہ جاتی اصلاحات کے ایجنڈے پر عملدرآمد شروع ہو گیا،وزیراعظم سے  گورننس کی بہتری کیلئے نئے تعینات شدہ  ماہرین نے ملاقات کی۔

وزیراعظم شہبازشریف نے شرکا سے گفتگو کرتے ہوئے کہاکہ گورننس کی بہتری کیلئے ماہرین کی تعیناتی سے فیصلہ سازی کے عمل میں بہتری آئے گی،عوامی مفاد کے اہم فیصلوں کی ماہرین کی رائے اور تنقیدی جائزے کے بعد  منظوری سے دور رس مثبت نتائج مرتب ہونگے،انہوں نے کہاکہ میرے لئے یہ انتہائی قابل مسرت امر ہے کہ ہم باصلاحیت اور اپنے شعبوں میں گراں قدر خدمات سر انجام دینے والے لوگوں کی خدمات سے مستفید ہوں گے،آپ سب پر ملکی امور کی فیصلہ سازی میں ماہرانہ رائے اور تعمیری سوچ شامل کرنے کی اہم ذمہ داری ہے،پر امید ہوں کہ آپ اپنی ذمہ داریاں انتہائی احسن طریقے سے سر انجام دینگے۔

وزیراعظم نے کہاکہ حکومت ملک کے ہر شعبے میں بہتری کیلئے اصلاحات کا ایجنڈا نافذ کر رہی ہے،ڈیجیٹائزیشن، خودکار نظام اور فیصلہ سازی میں بہتری ہی جدید دور میں ترقی و خوشحالی کے ضامن ہیں۔

وزیر اعظم کو بتایا گیا  کہ یہ  ماہرین اپنے شعبہ جات میں حکومت کو ماہرانہ اور تنقیدی رائے اور جائزہ دیں گے، جس سے مختلف  سیکٹرز میں بہتر فیصلے کرنے میں مدد ملے گی،ملاقات میں وفاقی وزیر اقتصادی امور احد خان چیمہ، رانا احسان افضل اور متعلقہ اعلیٰ حکام نے شرکت کی،اجلاس میں نئے تعینات شدہ افسران کے تعارف کے ساتھ ساتھ انکو  انکی ذمہ داریوں سے بھی آگاہ کیا گیا۔

یہ بھی پڑھیں:چیمپئنز ٹرافی میچز،بھارت کھیلنے کیلئے مان گیا