عمر امین گنداپور میئر کا الیکشن لڑنے کیلئے اہل قرار

 (24 نیوز) اسلام آباد ہائی کورٹ نے الیکشن کمیشن کا فیصلہ غیر قانونی قرار دیتے ہوئے علی امین گنڈا پور کے بھائی عمر امین گنڈا پور کو میئر کا الیکشن لڑنے کیلئے اہل قرار دے دیا۔عدالت نے وزیر ٹرانسپورٹ خیبرپختونخوا شاہ محمد کی نااہلی بھی کالعدم قرار دے دی۔ 

 چیف جسٹس اسلام آباد ہائی کورٹ اطہر من اللہ کی سربراہی میں سنگل بنچ نے پی ٹی آئی رہنما عمر امین گنڈا پور کی نااہلی کے خلاف درخواست پر سماعت کی۔ چیف جسٹس کا کہنا تھا کہ عمر امین گنڈاپور پر الزام ہے کہ ان کے بھائی علی امین گنڈاپور نے انتخابی مہم چلائی، الیکشن کمیشن نے پہلے جرمانہ کرنا تھا، اس کے بعد نااہلی کا مرحلہ آتا ہے، یہ جرمانے والا مرحلہ کیسے رہ گیا؟۔

 صوبائی وزیر ٹرانسپورٹ شاہ محمد کی الیکشن کمیشن کی جانب سے نااہلی کے خلاف درخواست پر سماعت کے دوران چیف جسٹس کا کہنا تھا کہ جب اتنی سنگین خلاف ورزی ہو گی تو پھر پوری سیاسی جماعت ذمہ دار ہو گی، اتنی خلاف ورزی کہ ایک وزیر بیلٹ باکس ہی اٹھا کر لے جائے۔

صوبائی وزیر کے وکیل نے کہا کہ مخالف امیدوار کی جانب سے الزامات لگائے گئے، ہائی پاور انکوائری کمیٹی بنی جس نے اپنی فائنڈنگ دیں، اسسٹنٹ پریذائیڈنگ افسر نے اپنی جگہ کسی اور کو بٹھا دیا اور کہا کہ آدھے پیسے آپ لے لینا۔

چیف جسٹس نے کہا کہ الیکشن کمیشن کا آرڈر دکھا دیں کہ وہ اس بارے میں کیا کہتا ہے ؟ اس کورٹ کی اپروچ ہے کہ الیکشن کے معاملات میں مداخلت نہ کی جائے، یہ اپیل نہیں ہے، بتا دیں کہ یہ عدالت رٹ کے دائرہ اختیار میں کس حد تک جا سکتی ہے ؟ الیکشن میں بیلٹ باکس اٹھانے کے الزامات معمولی نہیں ہیں، عدالت جو بھی آرڈر کرے گی وہ عدالتی نظیر بنے گی، الیکشن کمیشن کو تو مزید مضبوط اور بااختیار کرنا چاہئے۔

یہ بھی پڑھیں:ڈرون کیمرے والا سمارٹ فون اب پاکستان میں بھی دستیاب

وکیل وزیر ٹرانسپورٹ خیبر پختونخوا احسن بھون کا کہنا تھا کہ جو کچھ وہاں الیکشن میں ہوا یہ لوکل لوگوں کا کام نہیں ہے، یہ جگہ بالکل بارڈر پر ہے، وہاں جے یو آئی کا پلڑا بھاری ہے، بارڈر کی دوسری جانب سے بندے کون لایا، اس کا نام کوئی نہیں لیتا، نہ حکومت ان کا نام لے رہی ہے نہ ہی یہ لوگ لیتے ہیں۔

یہ بھی پڑھیں:عامر لیاقت کی ٹک ٹاکر دانیہ سے خفیہ شادی۔۔ نکاح کن شرائط پر ہوا؟

چیف جسٹس اطہر من اللہ نے دلائل سننے کے بعد مختصر فیصلہ جاری کیا۔