سپین میں پاکستانیوں کی مہمان نوازی پر" پشپا2" سٹار کا محبت بھرا پیغام

 (24 نیوز)مشہور جنوبی بھارتی فلم پشپا 2 کے اداکار نے انکشاف کیا ہے کہ انہیں سپین میں پاکستانیوں نے پہچان لیا اور ان کی مہمان نوازی بھی کی۔

بھارتی میڈیا رپورٹ کے مطابق حال ہی میں حیدرآباد میں فلم 'پشپا 2: دی رول' کی کامیابی کا جشن منایا گیا، جس میں ہدایتکار سُکمار، مرکزی اداکار اللو ارجن اور پوری ٹیم نے شرکت کی۔

اس موقع پر اداکار سنیل، جو فلم میں منگلم سینو کا کردار ادا کر رہے ہیں، نے ایک دلچسپ واقعہ بتایا کہ جب وہ سپین میں موجود تھے اور پاکستانیوں نے ان کو پہچان لیا پھر خوب مہمان نوازی بھی کی۔

سنیل نے بتایا کہ وہ حال ہی میں اجیت کمار کی فلم ’گڈ بیڈ اگلی‘ کی شوٹنگ کے لیے سپین میں موجود تھے۔ ایک دن شوٹنگ کے بعد جب کھانے کی تلاش میں نکلے تو ایک گیس اسٹیشن پر رات 10 بجے کے قریب کچھ سنیکس خریدے، لیکن بھوک برقرار رہی۔

مزید پڑھیں:ہمیں خطرہ نہیں ہے، گارڈ نہیں رکھوں گا، سیف علی خان

 انہوں نے بتایا کہ وہ اور ان کی ٹیم قریب میں کھلے ریسٹورنٹس ڈھونڈ رہے تھے، تبھی انہیں ایک کباب پوائنٹ نظر آیا، جو بند ہوچکا تھا، باہر کھڑے افراد کو دیکھ کر انہیں لگا کہ وہ بھارتی ہیں۔

اسی دوران ایک شخص نے سنیل کو پہچان لیا اور کہا کہ وہ انہیں ’پشپا 2‘ کے انٹرویل سین میں دیکھ چکے ہیں، تصدیق کے لیے اس نے اپنے فون پر وہ سین دوبارہ دیکھا، اداکار کا کہنا تھا کہ انہیں بعد میں معلوم ہوا کہ وہ لوگ پاکستانی تھے، جنہوں نے ان کے لیے خصوصی طور پر کھانا تیار کیا۔ سنیل نے کہا کہ ’پشپا‘ کی غیرمعمولی مقبولیت نے انہیں دنیا بھر میں مشہور کر دیا ہے۔

یاد رہے کہ ’پشپا 2‘ کو 5 دسمبر کو سینما گھروں میں ریلیز کیا گیا تھا اور بعد ازاں نیٹ فلکس پر بھی پیش کیا گیا۔