(24 نیوز) لیجنڈ گلوکار عطا اللہ خان عیسیٰ خیلوی کے صاحبزادے گلوکار سانول خان عیسی خیلوی کی میوزک انڈسٹری میں بڑی انٹری، ملکی و بین الاقوامی سطح پر بڑے میوزک پروجیکٹس مکمل جو جلد ریلیز کے لیے تیار ہیں۔
پاکستانی فوک میوزک کو دنیا میں نمایاں پہچان دلانے والے لیجنڈ گلوکار عطا اللہ خان عیسی خیلوی کی فن موسیقی کی میراث کو آگے بڑھانے کے لیے ان کے صاحبزادے گلوکار سانول خان عیسیٰ خیلوی نے میوزک انڈسٹری میں بڑی انٹری دے دی ہے۔
حال ہی امریکہ سے پاکستان پہنچنے والے گلوکار سانول خان عیسیٰ خیلوی نے اپنی رہائش گاہ پرمیڈیا سے گفتگو کرتے ہوئے بتایا کہ انہوں نے بیرون ملک کئی میوزک پروجیکٹس کا آغاز کیا ہے، گانوں کی ویڈیو شوٹ مکمل کرنے وہ پاکستان آئے ہیں۔
سانول خان عیسیٰ خیلوی نے کہا کہ 2025ء میں میوزک لوورز کو پنجابی ،اردو اور سرائیکی زبان میں ایسے گیت سننے کو ملیں گے جو ماضی اور حال کا شاندار امتزاج ہوں گے۔
یہ بھی پڑھیں : تیز ہواؤں اور گرج چمک کیساتھ بارش ،پہاڑوں پر برفباری کی پیشگوئی
سانول عیسی خیلوی کا مزید کہنا تھا کہ انہوں نے اپنے والد عطا اللہ خان عیسیٰ خیلوی کے ساتھ بھی گانے تیار کئے ہیں، والد نے جس طرح فن موسیقی میں نام بنایا کوشش ہے ان کی فن گائیکی کی میراث کو شاندار انداز میں لے کر آگے بڑھوں۔
سانول خان عیسیٰ خیلوی نے کہا کہ وہ بہت جلد ماہ رمضان کی مناسبت سے نعت شریف بھی ریلیز کریں گے۔