مسلم لیگ ن اور  پیپلزپارٹی کے رہنمائوں کا مشترکہ اجلاس،خیبر پختونخوا کی مجموعی صورتحال پر مشاورت

(روزینہ علی) گورنر خیبر پختونخوا فیصل کریم کنڈی کی رہائشگاہ پر حکمران جماعت پاکستان مسلم لیگ نواز اور  پاکستان پیپلزپارٹی کے رہنماؤں کا مشترکہ اجلاس، دونوں بڑی سیاسی جماعتوں کے رہنماؤں کی خیبر پختونخوا کی مجموعی صورتحال پر مشاورت ۔

تفصیلات کے مطابق گورنر خیبر پختونخوا کی اسلام آباد رہائشگاہ پرمسلم لیگ نواز اور  پاکستان پیپلزپارٹی کے رہنماؤں نےخیبر پختونخوا کی مجموعی صورتحال پر مشاورت کی۔ اجلاس میں پاکستان مسلم لیگ ن سے رانا ثناءاللہ، امیر مقام، سردار محمد یوسف، خواجہ سعد رفیق، مرتضٰی جاوید عباسی نے شرکت کی جبکہ پیپلز پارٹی کے صوبائی صدرمحمد علی شاہ باچا، صوبائی جنرل سیکرٹری شجاع خانزادہ، رکن صوبائی اسمبلی احمد کریم کنڈی کی اجلاس میں شریک ہوئے۔اجلاس میں وزیر اعظم شہباز شریف اور چئیرمین پاکستان پیپلزپارٹی بلاول بھٹو زرداری کی ہدایت پر دونوں جماعتوں کے رہنماؤں نے خیبرپختونخوا میں بدامنی، معاشی بحران اور سیاسی عدم استحکام پر تشویش کا اظہار کیا۔اجلاس میں خیبر پختونخوا میں پائیدار امن سمیت صوبہ کی مجموعی ترقی کیلئے مشترکہ جدوجہد و لائحہ عمل طے کرنے اور صوبہ کی ترقی کیلئے ہم خیال سیاسی جماعتوں سے بھی رابطہ کر کے مشاورتی عمل میں شامل کرنے پر اتفاق  کیا۔

اجلاس میں صوبہ کی مجموعی ترقی کیلئے مشاورت کا باقاعدہ سلسلہ جاری رکھنے پر بھی اتفاق کیا گیا، شرکا نے دہشتگردی کے خاتمے اور قیام امن کیلئے قانون نافذ کرنیوالے اداروں اور  دہشتگردی کیخلاف جنگ میں قیمتی جانوں کا نذرانہ پیش کرنیوالے شہداء کو خراج عقیدت پیش کیا گیا۔اجلاس میں شریک سیاسی جماعتوں کے رہنماؤں نے صوبہ میں دن بدن بڑھتی بدامنی کی خراب صورتحال پر صوبائی حکومت کی مجرمانہ خاموشی پر تشویش کا اظہار کیا۔

یہ بھی پڑھیں: کیا ڈرامہ لگایا ہوا ہے،علیمہ خان کی پی ٹی آئی کے وکلاء کو شٹ اپ کال