بچیاں ہمارے مستقبل کی بنیاد ہیں: شیری رحمٰن

(24نیوز)پاکستان پیپلز پارٹی کی رہنما شیری رحمٰن کا کہنا ہے کہ بچیاں ہمارے مستقبل کی بنیاد ہیں۔

نائب صدر پیپلز پارٹی سینیٹر شیری رحمٰن نے بچیوں کے عالمی دن پر پیغام جاری کرتے ہوئے کہا کہ بچیوں کے عالمی دن پر ملک کی ہر بچی کو مبارکباد اور نیک خواہشات کا اظہارکرتی ہوں۔

ان کا کہنا ہے کہ بچیوں کی ترقی کو فروغ دے کر ہم ایک مضبوط اور بہتر معاشرے کی بنیاد رکھ سکتے ہیں، وہ رکاوٹیں دور کرنا ہوں گی جو بچیوں کے آگے بڑھنے اور جو ان کے خوابوں کی تکمیل میں رکاوٹ بنتی ہیں۔

انہوں نے مزید کہا کہ پاکستان میں 1.2 کروڑ بچیاں سکول سے باہر ہیں، صرف 13 فیصد بچیاں نویں جماعت تک پہنچتی ہیں، بچیوں کی تعلیم کی یہ رفتار رہی تو تمام بچیوں کے سکول جانے میں 50 سال لگیں گے۔

شیری رحمٰن نے یہ بھی کہا کہ ہمیں فوری طور پر یقینی بنانا ہو گا کہ ہر بچی کو معیاری تعلیم تک رسائی حاصل ہو۔