پاکستان اوربنگلہ دیش ٹیسٹ سیریز کی ٹکٹوں کی قیمتوں کا اعلان 

(وسیم احمد)پاکستان کرکٹ بورڈ (پی سی بی )نے پاکستان اور بنگلہ دیش ٹیسٹ سیریز کی ٹکٹوں کی تفصیلات کا اعلان کر دیا ہے ۔
 پی سی بی کی جانب سے کہا گیا ہے کہ شائقین کی سہولت کیلئے سیزنل پاس بھی متعارف کرائے گئے ہیں جن پر 15فیصد ڈسکاؤنٹ ہوگا،پاکستان اور بنگلہ دیش کے درمیان 2میچوں کی ٹیسٹ سیریز کے ٹکٹ 13 اگست سے PCB.tcs.com.pk پر شام پانچ بجے آن لائن فروخت ہوں گے,شائقین کی سہولت کے لیے فزیکل ٹکٹ 16 اگست سے صبح 9 بجے کے بعد مختلف آؤٹ لیٹس پر دستیاب ہوں گے ۔
سیریز آئی سی سی ورلڈ ٹیسٹ چیمپئن شپ کا حصہ ہے,پہلا ٹیسٹ میچ 21 سے 25 اگست تک راولپنڈی کرکٹ سٹیڈیم میں کھیلا جائیگا،دوسرا ٹیسٹ میچ 30 اگست سے 3 ستمبر تک کراچی کے نیشنل بینک سٹیڈیم میں کھیلا جائے گا،دونوں ٹیسٹ میچوں کے ٹکٹس سستے ریٹ پر رکھے گئے ہیں،کم از کم قیمت 50روپے (کراچی میں جنرل انکلوژر/ وسیم باری انکلوژر) سے شروع ہے اور کراچی میں  2 لاکھ 50 ہزار روپے ( مکمل ہاسپٹلٹی باکس ) تک ہے۔
اس کے علاوہ میچ کے مقامات کے باہر باکس آفسز دونوں اسٹیڈیم میں ٹیسٹ میچ سے دو دن پہلے کام کریں گے،اگروہ ٹیسٹ میچ کے لیے پانچ دن کا سیزن پاس خریدتے ہیں تو انھیں 15 فیصد رعایت دی جائے گی،پانچ روزہ میچ کے جلد ختم ہونے کی صورت میں باقی دنوں کے ٹکٹ کے پیسے شائقین کو واپس کر دیے جائیں گے۔
راولپنڈی کرکٹ اسٹیڈیم میں پریمیم انکلوژرز ( میراں بخش، سہیل تنویر اور یاسر عرفات) کے ٹکٹ شائقین کے لیے 200 روپے میں دستیاب ہوں گے،وی آئی پی انکلوژرز (عمران خان اور جاوید میانداد) 500 روپے میں دستیاب ہوں گے،ویک اینڈ پر یہ 600 روپے میں دستیاب ہونگے،راولپنڈی کرکٹ اسٹیڈیم میں گیلری پاس، جس میں دوپہر کا کھانا اور چائے شامل ہے 2800 روپے میں دستیاب ہوگا،پلاٹینم باکس جس میں لنچ اور چائے بھی شامل ہے 12500 روپے میں دستیاب ہوگا۔
شائقین 2 لاکھ روپے میں مکمل ہاسپٹلٹی باکس حاصل کر سکتے ہیں،کراچی میں فرسٹ کلاس انکلوژرز ( آصف اقبال، ماجد خان، وقار حسن اور ظہیر عباس) 100 روپے میں دستیاب ہوں گے،شائقین کو پریمیم انکلوژرز (عمران خان، قائد اور وسیم اکرم ) کے لیے 200 روپے ادا کرنے ہوں گے،وی آئی پی انکلوژرز (فضل محمود، حنیف محمد اور جاوید میانداد) 400 روپے اور ویک اینڈ میں 500 روپےمیں دستیاب ہوں گے،کراچی میں ہر ہاسپیٹلٹی باکس سیٹ (بشمول لنچ اور چائے) کی قیمت 12,500 روپے ہوگی ،راولپنڈی کرکٹ اسٹیڈیم میں پلاٹینم کا شیئرڈ باکس اسی قیمت پر دستیاب ہوگا۔