انڈر 19 ایشیاء کپ: پاکستان، افغانستان کو شکست دیکر سیمی فائنل میں پہنچ گیا

(ویب ڈیسک) انڈر19 ایشیاء کپ کے اہم میچ میں پاکستان افغانستان کو 83 رنز سے ہرا کر سیمی فائنل میں پہنچ گیا۔

یہ اس ٹورنامنٹ میں پاکستان انڈر19 ٹیم کی مسلسل تیسری کامیابی ہے۔ اس سے قبل  پاکستانی ٹیم نیپال کو 7 اور انڈیا کو 8 وکٹوں سے ہراچکی ہے۔

منگل کے روز آئی سی سی اکیڈمی گراؤنڈ میں کھیلے گئے میچ میں افغانستان نے ٹاس جیت کر پاکستان کو بیٹنگ کی دعوت دی۔ پاکستانی ٹیم 48 اوورز میں 303 رنز بناکر آؤٹ ہوگئی۔

جواب میں افغانستان  کی ٹیم 48.4 اوورز میں 220 رنز پر ڈھیر ہوگئی۔

پاکستان انڈر 19 ٹیم نے افغانستان انڈر 19 ٹیم کو 83 رنز سے شکست دیدی۔

پاکستان کی جانب سے شامل حسین، شاہ زیب خان اور ریاض اللہ نے نصف سنچریاں سکور کیں۔

عبید شاہ 3، طیب عارف 3، خبیب خلیل 2، عامر حسن 1، اور شامل حسین نے 1 وکٹ حاصل کی۔

پاکستان ٹیم اپنا سیمی فائنل کا میچ 15 دسمبر… pic.twitter.com/pLjwOekwts

— PCB Media (@TheRealPCBMedia) December 12, 2023

پاکستان کے اوپنرز شامل حسین اور شاہ زیب خان نے ٹیم کو 115 رنز کا اچھا آغاز فراہم کیا۔ شاہ زیب خان 9 چوکوں اور ایک چھکے کی مدد سے79 رنز بناکر آؤٹ ہوئے۔

شامل حسین نے جارحانہ بیٹنگ کرتے ہوئے 54 گیندوں پر 75 رنز کی اننگز کھیلی جس میں 5 چھکے اور 7 چوکے شامل تھے۔  ریاض اللہ نے 5 چوکوں اور 2 چھکوں کی مدد سے 73 رنز اسکور کیے۔

پاکستانی بولرز کی عمدہ بولنگ نے افغانستان کی ٹیم کو کسی بھی موقع پر حاوی نہیں ہونے دیا۔ افغانستان کی جانب سے نعمان شاہ چار چوکوں اور ایک چھکے کی مدد سے 54 رنز کے ساتھ ٹاپ اسکورر ہے۔

پاکستان  کی جانب سے عبید شاہ نے 19 اور طیب عارف نے 51 رنز دے کر تین، تین کھلاڑیوں کو آؤٹ کیا۔ اپنا پہلا انڈر 19 ون ڈے کھیلنے والے خبیب خلیل نے 45 رنز دے کر دو کھلاڑیوں کو آؤٹ کیا۔

جارحانہ بیٹنگ کرتے ہوئے نصف سنچری اسکور کرنے و الے پاکستانی بیٹر شامل حسین کو پلیئر آف دی میچ  کا ایوارڈ دیا گیا۔