چیمپئنز ٹرافی کس فارمیٹ پر ہوگی؟تازہ ترین پیشرفت سامنے آگئی

(ویب ڈیسک)آئی سی سی چیمپئنز ٹرافی کے تنازع کی گتھی تاحال نہ سلجھ سکی،ڈیڈلاک برقرار ہونے کے باوجود نئی پیشرفت سامنے آگئی ۔

بھارت نے سکیورٹی خدشات کے پیش نظر ٹیم پاکستان بھیجنے سے انکار کردیا تھا جبکہ پاکستان بھی اپنے مؤقف پر قائم ہے۔جس کی وجہ سے ایونٹ کا شیڈول بھی ابھی تک جاری نہیں کیا گیا۔

گزشتہ دنوں پاکستان کرکٹ بورڈ نے چیمپئنز ٹرافی کے تنازعے کے دیرپا حل کیلئے پارٹنرشپ فارمولا پیش کیا تھا جس کے مطابق پاکستان اور بھارت دونوں ممالک ایک دوسرے کے ملک میں کوئی ایونٹ نہیں کھیلیں گے ۔

یہ فارمولا چیمپئنز ٹرافی سے لاگو ہوگا اور 3 برس تک رہے گا جس کے تحت بھارت دبئی میں میچز کھیلے گا اور پاکستان بھی اگلے 3 سال تک اپنے تمام میچز دبئی میں کھیلے گا۔

پاکستان کرکٹ بورڈ کو بھارتی کرکٹ بورڈ یا آئی سی سی سےاس فارمولے پر تاحال کوئی باضابطہ جواب نہیں ملا ہے۔

یہ بھی پڑھیں:ہیڈ کوچ کا بھی قومی ٹیم کے ساتھ سفر تمام ،مستعفی ہونے کا فیصلہ 

تاہم اب بھارتی میڈیا کی جانب سے ایک اور پیش رفت سامنے آئی ہے کہ چیمپئنز ٹرافی جو ون ڈے فارمیٹ میں ہونی ہے، وہ اب ٹی ٹوئنٹی فارمیٹ میں کھیلی جاسکتی ہے۔

بھارت کی کرکٹ ویب سائٹ کرک بز کے مطابق چیمپئنز ٹرافی کے تنازعے کے حل میں تاخیر کی وجہ سے ایونٹ کو روایتی ون ڈے فارمیٹ سے تبدیل کرکے ٹی ٹوئنٹی فارمیٹ میں کرائے جانے کا امکان ہے۔

یہ ممکنہ تبدیلی ون ڈے کرکٹ کی گرتی ہوئی مقبولیت اور شائقین میں ٹی ٹوئنٹی میچز کی بڑھتی ہوئی پسندیدگی کے باعث کی جا سکتی ہے۔

البتہ اس حوالے سے ابھی تک کوئی واضح فیصلہ نہیں ہوا ہے۔

واضح رہے کہ چیمپئنز ٹرافی 2025 کی میزبانی پاکستان کے پاس ہے۔

ضرور پڑھیں:پاکستان کیخلاف ون ڈے سیریز ، جنوبی افریقہ نے سکواڈ کا اعلان کر دیا