بالی ووڈ کے وکھری ٹائپ کے ولن پران کا آج یوم پیدائش

(24 نیوز) بھارت کی فلم انڈسٹری کے مشہور اداکار پران نے پچاس اور ستر  کی دہائی کے دوران فلم انڈسٹری میں ولن کا  کردار ادا  کرنے والے تنہا حکمران کی حیثیت سے اپنی اداکاری کا لوہا منوایا۔وہ 12فروری 1920کو پیدا ہوئے ، انکی لازوال اداکاری کو لوگ آج بھی یاد کرتے ہیں۔

تفصیلات کے مطابق فلم اداکار پران کا پورا نام پران کشن سکند تھا۔انکی پیدائش 12فروری 1920کو پرانی دہلی کے علاقے بلیماران کے ایک خوشحال پنجابی گھرانے میں ہوئی تھی۔انکے والد کیول کرشن سکند ایک سول انجینئر تھے ۔رام پور کے سکول سے تعلیم مکمل کرنے کے بعد وہ دہلی میں بطور پروفیشنل فوٹوگرافر کام کرنے لگے تھے۔اسی دوران پرانکی ملاقات لاہور کے مشہور سکرپٹ رائٹر ولی محمد سے ہوئی۔ولی محمد نے پرانکی صورت دیکھ کر انہیں فلموں میں کام کرنے کا مشورہ دیا ۔پران نے اس وقت ولی محمد کے مشورے پر توجہ نہیں دی لیکن انکے بار بار کہنے پر وہ تیار ہو گئے۔

اداکار پران نے 1940 میں بنائی جانے والی فلم ’یملا جٹ‘ سے اپنے فلمی کریئر کا آغاز کیا جبکہ وہ 1942میں بنائی گئی فلمم ’خاندان‘ میں سب سے پہلے اہم کردار میں نظر آئے۔پران نے 1942سے1946کے دوران لاہور میں تقریباً 22 فلموں میں کام کیا تھا جن میں سے 18فلمیں 1947تک ریلیز ہوگئیں تھیں۔